Deputetët e PS largohen nga Komisioni i Medias, Balla i rikthen: Votoni ligjet
Bllokimi i punimeve të Komisionit Parlamentar të Medias nga opozita ka bërë që deputetët e maxhorancës të largohen nga punimet e saj. Anëtarët e Komisionit të Medias janë mbledhur në sallën e Grupit të Partisë Socialiste, ku kanë pritur largimin e deputetëve të Partisë Demokratike nga mbledhja. Më pas, ata janë kthyer me urdhër të Taulant Ballës, kreut të Grupit të PSsë, që të zhvillojnë mbledhjen e komisionit aty ku u ndërprerë nga opozita. Rikthimi i maxhorancës në Parlament është komentuar nga Taulant Balla, i cili ka postuar dhe videon e zhvillimit të mbledhjes pa deputetët e Partisë Demokratike. Sipas Ballës, deputetët e PD- së po keqpërdoren nga Lulzim Basha dhe Sali Berisha, në përpjekje për të dëmtuar Shqipërinë dhe hapjen e rrugës së negociatave me Bashkimin Europian. “Rifillon punën normale Komisioni për Edukimin dhe Mjetet e Informimit Publik, pas dështimit të deputetëve të shpërdoruar të Lulit dhe Saliut, në përpjekjen donkishoteske për të dëmtuar Shqipërinë në rrugën e hapjes së negociatave me BE”, shkruan Balla në faqen e tij të “Facebook”. Ndërkohë që mbledhja e Komisionit, pas largimit të Albana Vokshit, është drejtuar nga nënkryetarja, Milva Ikonomi, e cila e ka quajtur sjelljen e opozitës si tentativë për të bllokuar punimet normale të Kuvendit. “Në pjesën e parë ne u larguam për të bërë 5 minuta pushim dhe për të reflektuar për një situatë jo të zakonshme që ishte në këtë Komision. Opozita erdhi dhe bëri ‘ show’- n e radhës, duke dashur të baltosë të gjithë procesin që ka të bëjë me Reformën në Drejtësi. Reforma në Drejtësi është një nga ato akte që ka marrë gjithë shoqëria shqiptare e udhëhequr nga Partia Socialiste, që kërkon të vendosë sistemin e së drejtës dhe funksionimin mirë të saj”, tha dje Milva Ikonomi.