Pakti me Greqinë, vijon klima konstruktive
Raundi i dytë i grupeve të ekspertëve zhvillohet në Athinë
Grupet e punës të negociatorëve u takuan dje në Athinë, nën një klimë konstruktive dhe bashkëpunuese. Ministria e Jashtme e Shqipërisë dhe ajo e Greqisë, me një deklaratë të përbashkët, kanë konfirmuar zhvillimin e raundit të dytë të grupit të negociatorëve në lidhje me përcaktimin e hapësirave detare mes Shqipërisë dhe Greqisë. “Përfundoi sot, më datë 15 maj 2018, në Athinë raundi i dytë i bisedimeve mbi përcaktimin e hapësirave detare mes Shqipërisë dhe Greqisë. Takimi u zhvillua në një klimë konstruktive dhe bashkëpunuese”, thuhet në tekstin e përbashkët të publikuar nga të dy ministritë e Jashtme. Dy javë më parë, dy grupet e mblodhën në Tiranë dhe deklarata e përbashkët e dy ministrive nuk ndryshonte nga ajo e djeshmja. “Sot, më datë 30 prill 2018, u zhvillua në Tiranë raundi i parë i bisedimeve mes Shqipërisë dhe Greqisë për kufizimin e zonave detare. Takimi u zhvillua në një klimë konstruktive dhe bashkëpunuese”, thuhet në njoftimin e ministrisë. Duket se palët kanë rënë dakord të bëjnë transparente nga negociatat vetëm ditën e mbajtjes së tyre dhe objektin e diskutimit, por asnjë detaj më shumë se çfarë çështjesh kanë zgjidhur dhe çfarë mbetet ende për t’u zgjidhur.
I vetmi që ka folur më shumë se deklaratat zyrtare të ministrive të jashtme, ka qenë ministri i Jashtëm grek, Nikos Kotzias, i cili 10 ditë më parë tha se parashikon firmosjen e marrëveshjes së detit me Shqipërinë në fund të muajit maj ose në fillim të qershorit. Në një intervistë dhënë për televizionin grek “SKAI”, Kotzias ka folur për politikën e jashtme të Greqisë, duke u shprehur optimist nga zhvillimet më të fundit lidhur me raundin e trete të bisedimeve me Shqipërinë. “Shpresoj deri në fund të majit, të kemi një marrëveshje. Në mos në fund të majit, në fillim të qershorit”, ka thënë ai. Kotzias theksoi se Ministria e Punëve të Jashtme po bën një punë të madhe, që do të shihet për disa javë, rreth të gjitha çështjeve që lidhen me Ligjin e Detit. “Jemi në diskutime me Shqipërinë, ekipet tona teknike janë takuar përsëri. Shpresojmë se deri në fund të majit do të kemi një marrëveshje dhe nëse jo në fund të majit, do të jetë në fillim të qershorit”, tha ai.