Negociatat, Rama takon Presidentin Macron në Paris
Presidenti: Po lexojmë në detaje raportin e KE për Shqipërinë
Kryeministri Rama u prit dje në Elyse nga Presidenti francez Emmanuel Macron. Takimi që ishte parashikuar të zgjaste 50 minuta, shkoi përtej axhendës, duke zgjatur 1 orë e 30 minuta.
Burime qeveritare thanë dje se Presidenti francez është shprehur me nota shumë pozitive për reformat, sidomos ajo në drejtësi, ndërkohë që burime nga delegacioni shqiptar theksojnë se Macron ka vlerësuar edhe rezultatet e luftës kundër krimit të organizuar dhe korrupsionit. Një shqetësim i hershëm për Francën ka qenë çështja e azilantëve shqiptarë, për të cilën Presidenti Macron mësohet se ka falënderuar Kryeministrin Rama për bashkëpunimin me institucionet e specializuara franceze, për të frenuar fenomenin e atyre që abuzojnë me sistemin e azilkërkimit. Nga po të njëjtat burime, pohohet se Kryeministri Rama ka ngulur këmbë në mënyrë insistuese duke kërkuar që në fund të qershorit Franca t’i njohë Sh- qipërisë meritën në procesin e integrimit europian dhe të pranojë hapjen e negociatave të anëtarësimit. Në përgjigje të kësaj kërkese, Presidenti Macron mësohet se ka theksuar se strukturat përkatëse në Paris janë angazhuar seriozisht në leximin e detajuar të raport të Komisionit Europian dhe në javët në vijim do të formësojnë edhe qëndrimin përfundimtar të Francës.
Rajoni dhe roli i Shqipërisë në të ka qenë tjetër temë e takimit, së bashku me samitin e Sofjes, ku Macron është shprehur se do të mbajë një fjalë tepër të rëndësishme.
FRANCA Ditën që Komisioni Europian prezantoi rekomandimin për hapjen e negociatave me Shqipërinë dhe Maqedoninë, Presidenti Francez, Emanuel Macron, vendi i të cilët është skeptik për sa i përket anëtarësimit të Shqipërisë në BE, ka deklaruar se zgjerimi i Bashkimit Euro- pian duhet të ndalet, pasi blloku ka nevojë që të reformohet. “Vendet anëtare të BE- së duhet të bien dakord në mënyrë unanime për anëtarësimin e vendeve të tjera. Anëtarësimi në BE ka qenë një forcë e fuqishme për reforma politike dhe demokratike në vende si Shqipëria, Bosnja dhe Hercegovina, Maqedonia dhe Mali i Zi. Nuk dëshiroj që Ballkani të kthehet drejt Turqisë ose Rusisë, por nuk dua një Eu- ropë që funksionon me vështirësi me 28 vende dhe që së shpejti do të mbesë me 27, të vendosë nëse mund të vazhdojë zgjerimin në mënyrë që të bëhemi 30 ose 32 vende që do të kemi të njëjtat rregulla”, u shpreh Presidenti Macron në Bruksel. Kësaj deklarate të Presidentit Macron, Kryeministri Rama i është përgjigjur pozitivisht. “Ajo që do i shtoja asaj që tha Presidenti Macron, është se Europa thellohet me veten, ne thellohemi me veten dhe ecim paralelisht, ne në procesin e negociatave, ata në procesin e reformimit të tyre dhe si dy forca të thelluara, takohemi në momentin kur vjen dita e zgjerimit. Sot diskutojmë për negocimin. Mos harrojmë se në Ballkan negociojnë Serbia dhe Mali i Zi dhe është e papranueshme që pas rekomandimit pozitiv të marrë dje, të mos përfshihet në negociatë dhe Shqipëria dhe Maqedonia”, tha Rama.