“Agron Xhafaj, i dënuar me 7 vjet burg për trafik droge në Europë dhe SHBA”
Partia Demokratike publikoi në 9 maj, në një konferencë urgjente, dosjen e plotë të dënimit me 7 vjet e dy muaj burg në Itali, të vëllait të ministrit të Brendshëm, Fatmir Xhafaj. PD publikoi vendimin e datës 25 shtator 2012 të Gjykatës së Kasacionit në Itali, ku Agron Xhafaj, vëllai i ministrit të Brendshëm Fatmir Xhafaj, dënohej me vendim të formës së prerë me 7 vjet e dy muaj burg. Nga shqyrtimi i vendimit gjyqësor të publikuar nga PD për Agron Xhafajn, rezulton se ai është dënuar: “Për pjesëmarrje në grup kriminal, që kishte për synim trafikun ndërkombëtar midis Europës dhe Shteteve të Bashkuara të Amerikës të lëndëve narkotike. Për drejtimin e një rrjeti të shpërndarësve të lëndëve narkotike heroinë, kokainë, hashash në Bolonja, Itali. Për bashkëpunim në importimin nga Shqipëria në territorin e shtetit italian dhe transportin e lëndëve narkotike, ku Agron Xhafaj bënte të mundur tërheqjen direkte të drogës së transportuar nga Shqipëria dhe të fshehur në rrethinat e bregdetit të Salernos. Për bashkëpunim me persona të tjerë, për mbajtjen në mënyrë të paligjshme, dhënien dhe marrjen e lëndës narkotike, ku Agron Xhafaj kishte rolin e shpërndarjes te blerësit e drogës së llojit heroinë dhe kanabis”, thuhet në dosjen e publikuar për Agron Xhafajn.