"Zhduket" Llalla, avokati në KPA: Nuk kam folur prej 2 javësh
Kolegji i Posaçëm i Apelimit ka shtyrë për datën 30 maj seancën për shqyrtimin e ankimit të komisionarit publik për ndërprerjen e procesit të vetingut ndaj ishKryeprokurorit, Adriatik Llalla. Shkak për këtë shtyrje u bë avokati i Llallës, Sokol Hazizaj, i cili që në nisje të seancës deklaroi se kishte dy javë që nuk kontaktonte me klientin e tij. Për këtë arsye, Kolegji i Posaçëm i Apelimit vendosi që ta shtyjë seancën për datën 30 maj, deri sa të rifreskohet prokura e Llallës me avokatin. Hazizaj, kërkoi jo më pak se 15 ditë kohë nga trupi gjykues, në përbërje të të cilit është edhe paraardhësja e Llallës në Prokurorinë e Përgjithshme, Ina Rama. Kujtojmë, se procesi i rivlerësimit për ish- Kryeprokurorin Llalla nisi në nëntor 2017, por ai u ndërpre me vendim të Komisionit të Pavarur të Kualifikimit. Shkak për ndërprerjen u bë dorëheqja e Llallës nga sistemi i drejtësisë. IshKryeprokurori Llalla vendosi që të mos e shfrytëzojë privilegjin ligjor për t’u emëruar në Apel. Mirëpo, pas regjistrimit të procedimit penal ndaj Llallës në mars të këtij viti në Prokurorinë e Durrësit, komisionari publik vendosi të apelojë vendimin për ndërprerjen e procesit të rivlerësimit ndaj ish- Kryeprokurorit. Mbetet të shihet se cilat janë argumentet e komisionarit për vazhdimin e vetingut për Llallën. Nga ana tjetër, ish- Kryeprokurori është nën hetim për katër vepra të ndryshme penale. Hetimet që nisën në mars të këtij viti në Prokurorinë e Durrësit, janë për veprat penale “refuzimin për deklarim, mosdeklarim, fshehjes ose deklarimit të rremë të pasurisë”, mosdeklarim të shumave të të hollave në kufi”, “pastrim të produkteve të veprës penale” dhe “shpërdorim detyre” të parashikuar nga nenet 257/ a, 179/ a, 287 dhe 248 të Kodit Penal. Më pas, këto hetime janë transferuar te Krimet e Rënda dhe dosja është marrë nga prokurori Klodian Braho.