Vuçiç: Kemi një lloj plani nga Perëndimi për Kosovën
Presidenti i Serbisë, Aleksandar Vuçiç, ka konfirmuar në Sofje, në prag të Samitit BE- Ballkani Perëndimor, se ka marrë një plan të përgatitur nga Perëndimi, si propozim për zgjidhjen e çështjes së Kosovës. Kjo është hera e parë që Vuçiç e ka thënë këtë publikisht, megjithëse mediat në Serbi kanë spekuluar prej ditësh se Perëndimi po e kërcënon dhe po e shantazhon Vuçiç dhe Serbinë. Por Vuçiç ka thënë për gazetarët në Sofje, se “Askush nuk po e kërcënon Serbinë e as mua. Ka pasur presion ndaj Serbisë prej pesë vitesh sepse Perëndimi dëshiron pavarësinë e Kosovës. Ne nuk e duam. A na obligon kjo? Jo. A është pozita jonë e lehtë? Jo. Nëse do të pranoja diçka që do t’i përshtatej opinionit serb, do të dilja para popullit, por unë kam marrë vetëm indikacione. Ne e kemi një lloj plani të caktuar, por nuk jam i kënaqur me detajet të caktuara. Jemi në kërkim të një zgjidhjeje kompromisi, që kërkon marrjen në konsideratë të interesave të serbëve në Kosovë, por edhe të Republikës së Serbisë”, ka përfunduar Vuçiç, duke thënë se disa nuk e kuptojnë këtë. Ndërkohë Presidenti i Kosovës, Hashim Thaçi, ka njoftuar se me të arritur në Sofje, për Samitin e Bashkimit Europian me shtetet e Ballkanit Perëndimor, është takuar me përfaqësuesen e lartë të BE- së për Punë të Jashtme dhe Politika të Sigurisë, Federica Mogherini, dhe Presidentin e Serbisë, Aleksandar Vuçiç.