Xhafaj qëndron në Qeveri, Rama kërcënon me burg
Prokuroria e Tiranës regjistron çështjen për kallzim të rremë
Kryeministri mbron ministrin e Brendshëm nga akuzat dhe kërcënon me burg: “Audio- përgjimi një mashtrim, synohet destabilizimi i qeverisjes dhe shkatërrimi i segmentit të fundit të rrugës për çeljen e negociatave me BE”. Ministri i Brendshëm flet për marrëdhëniet me vëllanë e tij dhe e quan audio- përgjimin një shantazh të mafies: “Nuk kam ndërmend të jap dorëheqjen”
Prokuroria e Tiranës ka regjistruar procedim penal për kallëzimin e Agron Xhafajt, vëllait të ministrit të Brendshëm në lidhje me audioregjistrimin e publikuar nga PD ditët e fundit. Burime brenda Prokurorisë thonë për “Panoramën” se procedimi penal është regjistruar për veprën penale të “kallëzimit të rremë”. Ende nuk janë marrë hapa konkrete nga Prokuroria në lidhje me kallëzimin e Agron Xhafajt, por pritet që në ditët në vazhdim, kur të mbërrijë ekspertiza për audioregjistrimin, të vendoset për më tej. Ditën e publikimit të audioregjistrimit të PD- së, ku pretendohet se vëllai i ministrit, Agron Xhafaj, ndihmon një person që të blejë një ngarkesë kanabisi në Vlorë, në Prokurorinë e Tiranës, në orët e mbrëmjes është dorëzuar kallëzimi. Agron Xhafaj ka kallëzuar dy deputetët e PD- së, Ervin Salianji, Enkelejd Alibeaj dhe zyrtarin e selisë blu, Gaz- ment Bardhi për “kallëzim të rremë”. Ai pretendon se audioregjistrimi është i montuar dhe nuk ka asgjë të vërtetë në të. Mirëpo, hetimi në Prokurorinë e Tiranës është i varur nga ai i Krimeve të Rënda. Audioregjistrimi autentik është marrë nga OPGJtë e Krimeve të Rënda dhe Prokuroria e Tiranës duhet të presë rezultatet e ekspertizës në lidhje me autenticitetin e regjistrimit. Vetë Agron Xhafaj mësohet se ka udhëtuar drejt shtetit italian me avokatin e tij për të sqaruar çështjen e dënimit të tij në Itali me rreth 7 vjet burg. Në një letër publike ditën e djeshme, ai thoshte se audioregjistrimi nuk është i vërtetë dhe është i montuar. Agron Xhafaj ka pranuar se dikur ka gabuar, duke iu referuar ngjarjeve të vitit 2002, por se tani bën një jetë të rregullt. Paralelisht me Prokurorinë e Krimeve të Rënda dhe Prokurorinë e Tiranës, verifikime për këtë rast është duke zhvilluar edhe Ambasada Amerikane në Tiranë.