Samiti i Sofjes, BE: Perspektivë europiane për Ballkanin, por jo anëtarësim
Macron: Zgjerimi të shihet me kujdes
Në Samitin e Sofjes, ku morën pjesë udhëheqësit e vendeve anëtare të BE- së për perspektivën e vendeve të Ballkanit Perëndimor, janë shprehur pro perspektivës europiane të rajonit, por jo për anëtarësim të shpejtë.
Presidenti francez, Emanuel Macron, një nga skeptikët e zgjerimit të BE- së, tha dje për mediat franceze se çdo zgjerim i ri duhet të shihet me shumë kujdes dhe ashpërsi. “Ajo që kemi parë gjatë 15 viteve të fundit është një rrugë që ka dobësuar Europën sa herë që mendojmë ta zgjerojmë atë. Dhe unë nuk mendoj që ne bëjmë një shërbim për vendet kandidate apo veten tonë, duke pasur një mekanizëm që në njëfarë mënyre nuk ka më rregulla dhe vazhdon të lëvizë drejt zgjerimit. Unë jam në favor të anëtarësimit të Ballkanit në Europë dhe të ecjes drejt Europës. Por unë mendoj se ne duhet të shohim çdo zgjerim të ri me shumë kujdes dhe ashpërsi” tha Presidenti Macron për gazetarët në samitin e kryeqytetit bullgar, Sofje. Ai deklaroi se është “Në favor të lëvizjes drejt zgjerimit, por më parë duhet gjithë siguria e nevojshme dhe së pari një reformë reale për të lejuar një thellim dhe funksionim më të mirë të Bashkimit Europian”.
RAMA Përmes një videoje të publikuar në llogarinë e tij në “Facebook”, Kryeministri Rama ka treguar takimet intensive me kryeministrat e disa vendeve anëtare të BE- së, siç ishte Kryeministri holandez Mark Rutte, ku ka shumë kundërshti për negociatat me Shqipërinë për shkak të problematikave me azilantët shqiptarë në Holandë. Rama është takuar edhe me Kryeministrin e grek Tsipras, me Presidentin serb, Vuçiç, me Presidentin e Këshillit Europian Antonio Tajani, por dhe Presidentin e Komisionit Europian, Juncker.
DEKLARATA Jo pa qëllim deklarata e përbashkët e samitit të Sofjes, e organizuar nga Kryeministri bullgar Borisov, i cilëson vendet e Ballkanit vende partnere të Bashkimit Europian. Udhëheqësit e Bashkimit Europian dhe vendet anëtare të unionit, në konsultim me partnerët e Ballkanit Perëndimor, miratuan “Deklaratën e Sofjes”, një plan i rrugës europiane të rajonit. Deklarata shpreh mbështetje ndaj perspektivës europiane të rajonit dhe përvijohen detyrat dhe parimet që palët duhet të përmbushin gjatë procesit të integrimeve europiane. “Bashkimi Europian është dhe do të mbetet partneri më i besueshëm i të gjithë rajonit të Ballkanit Perëndimor. Nuk shoh të ardhme tjetër për Ballkanin Perëndimor veç BE- së. Nuk ka alternativë tjetër, nuk ka plan B”, tha Donald Tusk, President i Këshillit të BE- së. Destinacioni është i qartë, por rruga do të jetë e vështirë, pasi siç tha vet Tusk, i pyetur nga gazetarët, përqendrimi është te substanca dhe jo te datat. Vendet anëtare të BE- së angazhohen që në bashkëpunim me vendet e Ballkanit Perëndimor të luftojnë krimin e organizuar, por dhe trafiqet e drogës dhe armëve. “BE- ja dhe partnerët e Ballkanit Perëndimor pranojnë se rezultatet në luftën kundër korrupsionit dhe krimit të organizuar janë thelbësore për transformimin politik dhe socio- ekonomik të rajonit dhe gjithashtu për qëndrueshmërinë dhe sigurinë rajonale. BE- ja përshëndet angazhimin e tyre për të ndërmarrë veprime të vendosura, në bashkëpunim me BE- në dhe me njëritjetrin, kundër trafikimit të qenieve njerëzore, kultivimit të drogës dhe kontrabandimit të armëve”, thuhet në deklaratë. Bashkëpunim vendet e BE- së kërkojnë edhe në luftën kundër terrorizimit. “Kundërshtimi i terrorizmit dhe ekstremizmit, duke përfshirë financimin, radikalizimin dhe kthimin e luftëtarëve terroristë të huaj, kërkon bashkëpunimin tonë të shtuar”, thuhet në deklaratë.