Basha: Rama- Xhafaj e dinin për përgjimin, kërcënuan dëshmitarin
“72 orë terror mbi bashkëshorten dhe fëmijët e dëshmitarit. E dinin që të hënën përgjimin”
Kryetari i opozitës, Lulzim Basha, akuzoi kryeministrin Rama dhe ministrin e Brendshëm, Fatmir Xhafaj se kanë shantazhuar dhe kërcënuar shtetasin Albert Veliun, i cili u shfaq pak ditë më parë në audio- përgjimin e publikuar nga PD.
Në një konferencë të jashtakonshme për mediat, Basha u shpreh me bindje se Rama dhe Xhafaj ishin në dijeni që nga dita e hënë se audio- përgjimi i publikuar nga PD ishte i vërtetë por bën gjithçka për të shkatërruar provat dhe për të likujduar dëshmimtarin. “Që prej publikimit të fakteve tronditëse të aferës kriminale Xhafaj, Edi Rama dhe Fatmir Xhafaj, në bashkëpunim me prokurorinë e kapur prej tyre, në bashkërendim dhe bashkëveprim me struktura kriminale dhe njerëz të krimit të organizuar, kanë vënë në lëvizje një skenar kriminal. Skenari i dyshes Rama Xhafaj është ky: Moho përgjimin. Kapjosh ose likuido dëshmitarin dhe familjen e tij. Shkatërro provat. Akuzo dhe kërcëno opozitën! Ky skenar ka dy qëllime: Mbrojten e Agron Xhafajt të kapur në flagrancë duke vazhduar aktivitetin kriminal të trafikut të drogës”, deklaroi Basha.
DËSHMIMTARI Sipas kreut të PD shteti është i kapur nga mafia ndaj edhe bën gjithçka për të kapur dhe për ta terrorizuar para se ai të jepte një rrëfim për PD. “Edi Rama dhe Fatmir Xhafaj gënjyen dje shqiptarët kur hodhën poshtë dëshminë kundër Agron Xhafajt. Ata e dinin që të hënën, se përgjimi është autentik. Ata u informuan që të hënën nga Agron Xhafaj, kush është dëshmitari X, por ata bënë gjithçka për ta kapur, për ta terrorizuar, joshur dhe kompromentuar dëshmitarin para se ai të jepte dëshminë tronditëse. Presion dhe terror ndaj familjes së dëshmitarit dhe vetë dëshmitarit po ushtrojnë edhe figura të krimit të organizuar, trafikantë droge, ushtarë dhe bashkëpunëtore të Agron Xhafajt. Qëllimi i presionit shtetëror dhe mafioz ndaj dëshmitarit dhe familjes së tij është vetëm një: komprometimi me çdo kusht i dëshmitarit dhe i dëshmive të tij tronditëse për Agron Xhafajn. Ja pse kanë ushtruar këto 72 orë terror mbi bashkëshorten dhe fëmijët e tij”, tha Basha.
PARALAJMËRIMI Basha ka paralajmëruar Kryeministrin Rama dhe ministrin e Brendshëm, Fatmir Xhafaj, të qëndrojnë larg bashkëpunëtorit Albert Veliu, pasi në të kundërt do të marrin përgjigjen e merituar nga PD. “E paralajmëroj sot Edi Ramën dhe Fatmir Xhafajn se, për çdo hap që do të ndërmarrin për të rrëmbyer, terrorizuar dhe vënë nën presion Albert Veliun, dëshmitarin e familjes mafioze Xhafaj dhe familjarët e tij, do të marrin përgjigjen më të ashpër nga opozita dhe populli!”, deklaroi kreu i PD- së.