Hahn: Strategjia e qartë, vendet e Ballkanit duhet të bëjnë përparime

Komisioneri për Zgjerim i Bashkimit Europian, Johannes Hahn, deklaron se shtetet e Ballkanit Perëndimor kanë të gjitha mundësitë të anëtarësohen në BE, por duhet bërë ende shumë punë. Qëndrimet e tij, komisioneri Hahn i dha në një intervistë për “DW” pas zhvillimit të Samitit të Sofjes në Bullgari. “Në Sofje ne përqendrohemi te “konektiviteti”, pra, në ato fusha, ku mund të zgjerojmë lidhjet në infrastrukturë, në sektorin e energjisë dhe në ofertat digjitale me njëri- tjetrin. Kjo ndikon edhe në një lidhje më të ngushtë me Bashkimin Europian. Me këtë perspektivë europiane ne ofrojmë investime shumë konkrete në infrastrukturë.

Ne kemi strategjinë e Ballkanit Perëndimor, të cilën e kemi publikuar në shkurt. Ajo tregon qartë një perspektivë europiane për të gjitha këto shtete. Por ende duhet bërë shumë. Ne jemi në shkëmbim të vazhdueshëm dhe në bashkëpunim me shtetet. Disa kanë ecur më shpejt se të tjerat, të gjithë kanë bërë përparime. Një aspekt shumë i rëndësishëm është që këto shtete të përgatiten për një anëtarësim të ardhshëm në BE edhe në infrastrukturë. Ne po punojmë për një zonë rajonale të tregtisë së lirë, që do t’u mundësojë shteteve që të kenë marrëdhënie më të mira tregtare me njëra- tjetrën. Synimi është që të rritet rendimenti ekonomik i të gjithë kandidatëve, që ata të bëhen më solidë dhe rezistencë dhe më të aftë për konkurrencë në Europë”, tha Hahn. Sipas komisionerit për Zgjerimin e BE- së, nuk mund të ketë një datë ekzakte për vendet aspirante, pasi vendimet do të merren në takimin e muajit qershor. “Kjo ka qenë një lloj ‘ date orientuese’. Vendimet do të merren vetëm në takimin tonë të radhës së Bashkimit Europian në fund të qershorit. Këtu bëhet fjalë vërtet për një datë të përkohshme, e cila duhet të tregojë seriozitetin dhe besueshmërinë e të gjithë procesit. Ne ndihemi të lidhur me detyrimet tona, por tani varet nga shtetet e Ballkanit që të arrijnë përparime. Horizonti i një perspektive europiane shkakton në rajon një lëvizje shumë të fortë në çështjet politike në rajon”, theksoi komisioneri për Zgjerimin e BE.