Master në UT, përgjysmohet tarifa për kategoritë në nevojë
Studentët e nivelit Master në Universitetin e Tiranës, pjesë e kategorive sociale, do të paguajnë vetëm gjysmën e tarifës vjetore. Ky është vendimi i senatit akademik të mbledhur një ditë më parë për të miratuar vendimin “Mbi efektin financiar të kategorive të studentëve, që plotësojnë kriteret e reduktimit të tarifës vjetore të shkollimit në masën 50% në programet e ciklit të dytë të studimeve me kohë të plotë për vitin akademik 20172018”. Bëhet fjalë për dhjetë kategori përfituese në vitet e mëparshme, por që me miratimin e ligjit të ri përjashtoheshin. Më konkretisht: personat që nuk shikojnë/ dëgjojnë; invalidët e punës dhe fëmijët e tyre; invalidët; para e tetraplegjikë dhe fëmijët e tyre; jetimët; romët; ballkano- egjiptianët; personi, njëri nga prindërit e të cilit është ndarë nga jeta e familja; fëmijët e ish- të dënuarve politikë si dhe fëmijët e policëve dhe ushtarakëve, që kanë humbur jetën për shkak të detyrës. Administratori i UT- së ka bërë një përllogaritje të përfituesve, duke numëruar në gjashtë fakultetet e UT- së 641 studentë të Masterit. Ndërsa përgjysmimi i tarifës për këta të fundit do t’i lërë një barrë financiare prej 40 milionë e 455 mijë lekësh dhe që do të mbulohet me të ardhurat e vetë universitetit. Për të përfituar, ata duhet të dorëzojnë në sekretari dokumentacionin që vërteton statusin e tyre ligjor pranë fakulteteve përkatëse. Ky vendim është rezultat i vendimeve të mëparshme qeveritare, që njihnin përgjysmimin e tarifës për këto kategori si dhe kërkesa të vetë studentëve. Pas kësaj, Aleanca Kombëtare e Studentëve zotohet që një nismë të tillë ta ndërmarrë dhe konkretizojë në të gjitha universitetet publike.