I riu vdes në komisariat, familjarët: E kanë dhunuar, kishte disa shenja në trup
Policia pretendon për vdekje natyrale. Bashkëshortja: Na tha nga dritarja se e kishin rrahur. I kanë injektuar dhe qetësues
Familjarët shkojnë në gjykatë për të ndjekur seancën për masën e sigurisë për 27- vjeçarin e arrestuar për vjedhje, por marrin lajmin për vdekjen e tij.
Enea Ftoj ka ndërruar jetë në ambientet e paraburgimit në Komisariatin e Korçës ku mbahej prej tri ditësh, i ndaluar si i akuzuar për vjedhje me dhunë. Familjarët e të riut akuzojnë Policinë se ka ushtruar dhunë, madje dhe për injektimin e qetësuesve. Ndërkohë, sipas Policisë, vdekja ka ardhur për shkaqe natyrale. Ngjarja është zbuluar mëngjesin e së enjtes ku familjarët kanë mësuar nga Gjykata se Enea kishte ndërruar jetë. Babai i tre fëmijëve ishte shoqëruar nga Policia, pasi dyshohej se ishte personi përgjegjës për disa vjedhje në qytetin e Korçës. Ai ishte shoqëruar tri ditë më parë, pasi ishte kapur në flagrancë duke vjedhur varësen e një gruaje nga Korça. Ndërkohë, mësohet se ishte edhe përdorues droge, fakt që pranohet dhe nga vetë bashkëshortja e tij. Sipas familjarëve të tij, paraditen e së enjtes, ata i janë drejtuar Gjykatës së Korçës për të ndjekur seancën për masën e sigurisë ndaj tij, por atje kanë mësuar papritur se ai nuk ishte paraqitur dot, pasi kishte ndërruar jetë në mënyrë të papritur. Pasi kanë parë nga afër trupin në morgun e spitalit, familjarët bëjnë përgjegjëse Policinë për ngjarjen e rëndë. Gjatë vizitës në morg, familjarët kanë mundur të fotografojnë trupin e pajetë të 27- vjeçarit në sallën ku do t’i nënshtrohet autopsisë. Në foto, edhe pse e paqartë, dallohen disa shenja dhune në trupin e të riut. Familjarët pretendojnë se 27- vjeçari, gjatë ditëve të qëndrimit në Komisariat, u kishte deklaruar nga dritarja se ishte dhunuar fizikisht, madje i kishin injektuar edhe qetësues. Bashkëshortja Entela Ftoj, kërkon që të shikohen pamjet e kamerave të in- stitucionit dhe të bëhen verifikime.
Si e morët vesh lajmin për vdekjen e bashkëshortit tuaj?
Në Gjykatë. Shkova se do t’i jepnin masën e sigurisë dhe atje u tha që nuk do bëhet gjyqi, pasi ka vdekur. Nuk po u besoja veshëve, vrapuam në morg në Komisariat, derisa vërtetuam që kishte vdekur. Na thanë që vdiq në gjumë, por unë e di që e kanë vrarë, ka vdekur nga dhuna.
Nga niseni kur thoni se e kanë dhunuar?
Policia e dhunoi. Kemi dëshmitarë edhe ditën që e arrestuan e kishin rrahur në mes të pazarit, një polic me emrin Alqi, Kreshniku dhe Elton Mustafa quhen. Pastaj edhe kur vija unë që i sillja ushqime dhe cigare më ka thënë nga dritarja që e kishin rrahur. Më tha edhe që po i bënin ilaçe qetësuese, sepse ishte përdorues droge. Ma tha me gojën e tij po më bëjnë “Diazepam”, “Loream” dhe gjilpëra. Unë iu thashë policëve që mos i bëni gjilpëra se e ka zemrën e dobët, por ata më thanë ai ka zemër ariu.
Pse u kërkuat mos i jepnin qetësues?
Ishte përdorues droge, heroine. I solla metadonin dhe iu kërkova që mos i jepnin asgjë tjetër për krizat, por nuk më dëgjuan. Më lanë tre fëmijë jetimë. Ai para dy muajsh doli nga burgu, sepse vuajti dënimin për vjedhje. Nuk u çmall dot me fëmijët. Nëse vodhi, le ta rikthenin në burg jo ta vrisnin. Vajzën e vogël e kam 10 muajshe, dy të tjerat 4 dhe 6 vjeç. Edhe ka vjedhur, por çfarë të bëjmë ne, pa punë, pa ndihmë ekonomike, pa asnjë të ardhur. Çfarë kërkoni tani? Të vërtetën dua. Më lanë rrugëve me 3 fëmijë, jam vetëm 21 vjeçe. Nuk do e tërheqim nga morgu, nëse nuk bëhet ekspertiza nga Tirana. Dua që të dënohen personat që ma bënë këtë. Ai vdiq nga dhuna, nga asgjë tjetër.