“Musine Kokalari, vetëdija e shkrimit dhe qëndresës”, njohja përmes teknologjisë
Ajo ishte një grua e kompletuar. Ndër të paktat gra të diplomuara në kohën e saj jashtë shtetit, shkrimtare e më pas edhe politikane. Mund të quhet me plot gojën shkrimtarja e parë femër, me një korpus të plotë letrar në poezi, prozë dhe memuaristikë. Vepra e Musine Kokalarit ishte pjesë e “Ditënetëve të Librit”. Biblioteka Kombëtare e Shqipërisë promovoi dje në Atriumin e Muzeut Historik Kombëtar botimin elektronik “Musine Kokalari, vetëdija e shkrimit dhe e qëndresës”, i cili tashmë gjendet njëherazi online në faqen zyrtare të BKSH- së dhe të Bibliotekës Kombëtare të Kosovës “Pjetër Bogdani”. Ky botim vjen si rezultat i bashkëpunimit të vijueshëm dhe të suksesshëm mes dy Bibliotekave Kombëtare dhe prezanton punën e dy institucioneve si dhe të studiuesve të shumtë përgjatë vitit 2017, të cilët i kushtuan një vëmendje të veçantë figurës emblematike të shkrimtares së parë shqiptare dhe intelektuales së shquar Musine Kokalari. Ky botim elektronik mund të shfletohet dhe shkarkohet lehtësisht në çdo pajisje elektronike si kompjuter, laptop, kindle, book reader, smartphone, tablet, kudo dhe kurdo.
E rrethuar kryesisht nga lexues të rinj, drejtorja e Bibliotekës Kombëtare, Persida Asllani, shfrytëzoi rastin jo thjesht të fliste për një qasje të re teknologjike, por më së shumti për një figurë si Musine Kokalari, për të cilën duket sikur flitet shumë, por që njihet pak. Asllani përfitoi nga rasti të fliste për veprën letrare të Kokalarit, veçoritë e krijimtarisë së saj, shprehur në poezi e prozës, por më e spikatur në këtë të fundit për muzikalitetin e gjuhës dhe pasurinë e jashtëzakonshme etnolinguistike.
Biblioteka Kombëtare e Shqipërisë është pjesëmarrëse në festivalin “Ditënetët e Librit”, organizuar nga Klik Ekspo Group, me mbështetjen dhe bashkëpunimin e Ministrisë së Kulturës, Ministrisë e Arsimit, Sportit dhe Rinisë dhe Bashkia Tiranë, duke promovuar qasjen e re në informacion dhe bibliotekave dixhitale, përmes programit të “Aftësimit në Informacion”, si një formë e re komunikimi me publikun e gjerë, që shfrytëzon teknologjitë e reja si burime referuese, duke nxitur bashkëveprimin e publikut me bibliotekën. Njohja e mjeteve dhe mënyrave të kërkimit është një nga proceset më të rëndësishme për të arritur te informacioni, duke shkuar drejt “Bibliotekave pa mure”.