Vdekja e 27- vjeçarit në qeli, protestë me arkivol para Policisë
KORÇE/ E ëma: Kishte shenja dhune
Pas vdekjes në Komisariat të viktimës Enea Ftoj, komuniteti rom i Korçës është organizuar dje në protestë. Familjarët e tij fajësojnë Policinë, pasi sipas tyre 27- vjeçari ka gjetur vdekjen për shkak të dhunës që është ushtruar ndaj tij.
Kortezhi për t’i dhënë lamtumirën e fundit është shoqëruar me pjesëmarrje masive nga familjarë, të afërm, miq, por edhe nga komuniteti rom dhe egjiptian. Ata kanë manifestuar nga banesa e 27- vjeçarit në drejtim të Komisariatit të Korçës me pankarta në duar, ndërsa kanë mbajtur në krahë arkivolin para Drejtorisë së Policisë. Pak para orës 16: 00, arkëmorti është nxjerrë nga apartamenti ku banonte familja Ftoj dhe është shoqëruar nga turma masive e njerëzve, të cilët mbanin pankarta në duar me mbishkrimet: “Duam Drejtësi”, “Na vratë babanë”, “Larg policisë raciste” etj.. Për më shumë se 20 minuta, arkivoli me trupin e pajetë është transportuar në krahë, ndërsa protestuesit, mes të cilëve edhe familjarët e 27- vjeçarit, kanë qëndruar para Komisariatit të Korçës duke i aku- zuar për vdekjen e djalit të tyre. Në apartamentin ku varfëria është e dukshme, heshtja e zisë thyhej nga të qarat e nënës dhe bashkëshortes së Eneas, të cilat vazhdimisht përsërisnin: “Na e vranë”. Mimoza, nëna e Enea Ftojt, tregon se lajmin për humbjen e të birit e më- soi në mënyrën më të keqe të mundshme ndërsa tronditet kur thekson se në trupin e djalit të saj ka parë shenja dhune. Gjithashtu, ajo tregon se një ditë para ngjarjes kishte shkuar bashkë me bashkëshorten e djalit, Entelën, për t’i dërguar ushqim dhe cigare, por policët nuk e kish- in lejuar që ta takonin me argumentin se po flinte gjumë.
Si e morët vesh lajmin? A kishit bërë përpjekje ta kontaktonit më parë djalin?
Para se të shkonim në Gjykatë, ne atë mëngjes shkuam në Komisariat që të pyesnim për Enean. Ata na thanë nuk hyni dot tani se po e bëjmë gati që ta dërgojmë në Gjykatë. Shkoni atje priteni. U nisëm ne dhe po prisnim në Gjykatë. Kur nusja dëgjon që brenda sallës po përmendej emri i Eneas. Kishte nisur gjyqi, por ne hymë. Iu kërkuam ndjesë për vonesën dhe iu thamë që jemi familjarët. Nuk na kundërshtuan dhe prokurori vazhdoi të lexonte. Pastaj në një moment u tha që si do veprojmë me çështjen sepse u njoftuam që Enea ka ndërruar jetë.
Ku i bazoni akuzat se djali është dhunuar nga policët?
Kur ma sollën në shtëpi i pashë vetë shenjat e dhunës. E kishin mavijosur djalin. Më prenë krahët, m’i morën jetën djalit. E kisha fëmijën e madh. Cili është apeli juaj? T’i dënojnë ata që e bënë. T’i gjejnë dhe t’i dënojnë. Nuk e lë me kaq vdekjen e djalit. Dua të vërtetën.