Audio- përgjimi, Paloka: Rama, skenar për të mbyllur hetimet
Partia Demokratike akuzon Kryeministrin Rama se po zbaton një skenar kriminal, që synon mbylljen e hetimeve pa vënë para drejtësisë vëllain e ministrit të Brendshëm, Fatmir Xhafaj. Në një deklaratë për mediat, nënkryetari i PD- së, Edi Paloka, u shpreh se Edi Rama dhe Fatmir Xhafaj po kërkojnë të mashtrojnë shqiptarët duke thënë se zëri në audio- përgjimin e publikuar nga PD nuk është i Agron Xhafajt. "Pjesë kryesore e këtij skenari është mohimi i zërit të Agron Xhafajt, që i siguroi ' Dëshmitarit X' gjetjen dhe transportin e hashashit me garancinë se Policia, nën varësinë e vëllait të tij ministër i Brendshëm, do t'i hapte rrugën. Edi Rama i mashtroi shqiptarët duke thënë se ka bërë një ekspertizë të zërit në një agjenci të specializuar, por ai akoma nuk ka treguar se cila është kjo agjenci. Edhe Fatmir Xhafaj tha të njëjtën gjë po atë ditë, por as njëri, as tjetri nuk bëjnë publik emrin e agjencisë që na paska bërë ekspertizën. Fatmir Xhafaj e di që zëri në përgjime është i të vëllait. E di që ' Dëshmitari X' dhe gazetari Jetmir Olldashi thonë të vërtetën. Prandaj e largoi me urgjencë të vëllain trafikant pa ua nxjerrë më parë shqiptarëve me zë dhe me figurë që ta bënin vetë identifikimin dhe të gjykonin të vërtetën. Edhe Edi Rama e di që Agron Xhafaj është koka e trafiqeve në Vlorë, prandaj gënjeu për ekspertizën e zërit dhe nuk iu përgjigj gazetarëve për emrin e agjencisë", deklaroi Paloka. Nënkryetari i PD- së akuzoi Kryeministrin se përmes rezultatit të audiopërgjimit që ka marrë nga një agjenci po i imponohet Prokurorisë. "Pjesa e dytë e këtij skenari është imponimi ndaj Prokurorisë të pranojë si ekspertizë të zërit të Agron Xhafajt rezultatin e paracaktuar nga vetë Edi Rama. Prandaj, Fatmir Xhafaj vazhdon të qëndrojë në detyrë: për të vazhduar manipulimin dhe shkatërrimin e provave, nëpërmjet kukullave të tij në Prokurori, Arta Marku dhe Donika Prela", theksoi Paloka. Nënkryetari i PD- së u bëri thirrje shqiptarëve të protestojnë më 26 maj për largimin e ministrit Fatmir Xhafaj. "Partia Demokratike ka thirrur të shtunën tjetër më 26 maj një protestë kombëtare për të bashkuar shqiptarët në një zë: Fatmir Xhafaj ik! Shqiptarët nuk mund të pranojnë më të qeverisen nga krimi! Ju ftoj të gjithëve, të shtunën në orën 11: 00, pa dallime partiake të bashkohemi në protestën kombëtare, për t'i dhënë mesazhin Europës se shqiptarët europianë refuzojnë një qeveri antieuropiane", tha Paloka.