Fqinji pa emër, Greqia refuzon edhe Ilindenin
Tsipras: Do të vazhdojmë negociatat për zgjidhje dinjitoze
Maqedonasit mbeten ende pa një emër zyrtar, pasi qeveria greke ka refuzuar propozimin e fundit, i cili u shfaq si një version i pranueshëm për të dyja palët dhe bëri optimistë edhe negociuesit ndërkombëtarë.
“Republika e Ilindenit të Maqedonisë” nuk është aspak zgjidhja e kompromisit për konfliktin që zgjat prej dekadash mes fqinjëve. Pasi diskutoi të shtunën me liderët e partive të tjera në Greqi dhe me Presidentin, Kryeministri grek, Alexis Tsipras, i dha fund spekulimeve për arritjen e një marrëveshjeje mbi emrin. Në një deklaratë, zyra e Tsipras ka njoftuar se Greqia do të vazhdojë të punojë me FYROM ( Maqedonia), për të gjetur një zgjidhje të pranueshme të emrit me përcaktim gjeografik ose kohor”. Tsipras tha se “Jemi në një pikë thelbësore të bisedimeve, ne e mbrojmë linjën kombëtare me kujdes dhe hapa të përgjegjshëm”. Ai shtoi se është një përgjegjësi shumë e madhe të negociosh në emër të të gjithë grekëve, duke marrë parasysh ndjeshmërinë e tyre. “Po punojmë për një zgjidhje që nuk do të jetë e dobët dhe nuk do të rrëzohet në pak muaj, e cila nuk do të ndikojë në dinjitetin dhe historinë e të dy popujve”. Në deklaratë shtohet se në zgjidhje duhet gjithashtu të ketë ndryshime kushtetuese për vendin fqinj, për të fshirë të gjitha ambiciet territoriale kundrejt Greqisë, gjë që opozita maqedonase nuk e pranon. Sipas zyrës së Tsipras, zgjidhja “Duhet të bazohet në paketën e propozimeve të paraqitura në tryezë nga i dërguari special i OKB- së, Matthew Nimetz”. PROPOZIMET E NIMETZ
Ndërmjetësi i OKB- së paraqiti më herët gjatë vitit pesë propozime për një mar- rëveshje mbi emrin. Këto ishin: Republika Nova Makedonija ( Republika Maqedonia e Re), Republika Severna Makedonija ( Republika e Maqedonisë Veriore), Republika Gorna Makedonija ( Republika e Maqedonisë së Sipërme), Republika Vardarska Makedonija ( Republika e Maqedonisë së Vardarit) dhe Republika Makedonija Skopje ( Republika e Maqedonisë, Shkup). KUNDËRSHTIMI
I OPOZITAVE Opozita në Shkup ka shprehur kundërshtim jo për emrin, por për kushtin kryesor të Greqisë për zgjidhjen, ndryshimet kushtetuese në Maqedoni. “Nuk do të lejojmë ndryshime të Kushtetutës. Kërkojmë garanci për identitetin kombëtar maqedonas, gjuhën, kulturën dhe kombësinë”, u deklarua nga VMRO- DPMNE. Ndërsa në Athinë, lideri i “Demokracisë së Re”, Kyriakos Micotakis, tha se “Ky emër historikisht dhe në mënyrë të drejtpërdrejtë lidhet me luftën për krijimin e popullit ‘ maqedonas’ dhe shtetit që përfshin Selanikun dhe shtrihet deri në Detin Egje. Cilado përmendje e Ilindenit në emrin e vendit fqinj, jo vetëm që nuk i jep fund irredentizmit të Shkupit, por përkundrazi, e vërteton dhe e forcon atë. Prandaj është e papranueshme, qoftë edhe të vendoset si temë diskutimi”, ishte reagimi nga Demokracia e Re. Ndërsa nga PASOK mesazhi ishte: “Shpresoj që Qeveria e Greqisë të mos negociojë për këtë emër”.