Meta në Berat, vlerësime dhe tituj nderi
Kreu i shtetit, Ilir Meta, ishte dje në qytetin e Beratit ku ka vlerësuar personalitetet e shquara të sportit të këtij qyteti. Në Bashkinë e Beratit u zhvillua ceremonia e dhënies së dekoratave për disa nga sportistët më të shquar të Beratit, ku Presidenti i Republikës vlerësoi me titullin “Naim Frashëri” peshëngritësin dhe trajnerin Vasil Hoço dhe futbollistin e paharruar, tashmë edhe ai trajner Përparim Kovaçi, kurse me titullin “Për Merita të Veçanta Civile” u nderuan ping- pongisti Ilir Shabanaj dhe volejbollistja e njohur e ekipit të ‘ Tomorit’, Ollga Gjoku. Në fjalën e tij përshëndetëse, Presidenti ka kujtuar kohën kur ishte i vogël dhe ishte i dhënë pas sportit. “Kur isha i vogël, kuptohet shumë i dhënë pas Tomorit, për arsyet që i dini ju, mbaj mend një këngë: ‘ Jani Kaçi, Jani Kaçi, ki kujdes nga ai Kovaçi! Po t’u afrua në zonën e rreptësisë, të mori gjysmën e revanisë’. Dhe vërtet, Përparim Kovaçi është një nga modelet më të shkëlqyera, më të suksesshme, që ka dhënë kontribute të shkëlqyera për futbollin në Berat. Ka qenë ndër golashënuesit më të mirë të kampionateve kombëtare. Sot ende është një model që mund të frymëzojë shumë të rinj dhe sidomos shumë fëmijë drejt fushës së blertë”, tha dje Presidenti. Meta tha më tej se: “Nuk ka ilaç më të mirë se sa sporti. Nuk ka asnjë alternativë më të mirë se sa sporti për t’i socializuar fëmijët, për t’i edukuar e për t’u dhënë shpirtin e garës, për t’i mësuar të jenë të organizuar, për t’i mësuar edhe me humbjen e për të mësuar edhe nga humbja, që të shkojnë te fitorja”. Gjatë vizitës në Berat, Meta mori pjesë në ceremoninë e zhvilluar në Pallatin e Kulturës, ku u dhanë çmimet për fituesit e Olimpiadës Mbarëkombëtare së Matematikës me pjesëmarrjen e fëmijëve nga të gjitha trevat shqiptare, teksa Qendra Kulturore e Fëmijëve të Durrësit i akordoi titullin “Mik i Fëmijëve” “Për kujdesin e treguar ndër vite dhe kontributin e dhënë, në rritjen dhe edukimin e fëmijëve, si qytetarë të denjë të Bashkimit Europian”.