Kompensimi, pronarët që ndajnë 10 milionë USD
Agjencia e Pronave publikon listën e pronarëve, që kompensohen me faturat e vendimeve të 1998. Dokumentet që duhen dorëzuar
Agjencia e Trajtimit të Pronave ka përfunduar procesin e vlerësimit financiar të vendimeve përfundimtare të vitit 1998, të cilat kanë njohur të drejtën e kompensimit të subjekteve të shpronësuara për të gjithë territorin e Republikës së Shqipërisë.
Në total, fondi që duhet për kompensimin e pronarëve me vendime të vitit 1998, është 1,076,261,467 lekë, ose rreth 10 milionë USD. Agjencia e Pronave ka llogaritur faturën financiare për 1778 pronarë, të cilët kanë marrë vendimin për njohjen e pronës në vitin 1998. Duke mbledhur faturën për çdo dosje, del që për të kompensuar çdo vendim qeveria shqiptare duhet të shpenzojë 10 milionë USD. Gazeta boton sot emrat e atyre që i është llogaritur fatura financiare nga ATP, për çdo qytet të vendit. Nga ana tjetër, gazeta zbardh edhe procedurën që duhet të ndjekë çdo pronar, për të aplikuar për paratë që i takojnë. Sipas formulës së re, pronarët do të marrin 20 për qind të parave në dorë dhe 80 për qind në formën e kompensimit fizik, në tokat që qeveria i ka kaluar ATP. Sipas Agjencisë, të gjithë subjektet e interesuara, kanë të drejtë të ankohen kundër vlerësimit financiar të kryer nga ATP- ja për përcaktimin e vlerës së pronës në Gjykatën Administrative të Apelit brenda 30 ditëve nga dita e publikimit, vetëm për vlerën e kompensimit. Ndërsa subjektet, të cilët evidentojnë mangësi në dokumentacion dhe problematika në vlerësim në regjistrin e vendimeve, mund të plotësojnë dokumentacionin e nevojshëm për vlerësimin financiar të vendimit të kompensimit, brenda një afati prej 6 muajsh nga data e publikimit të regjistrit.
Familjet që kanë vendime përfundimtare kompensimi, të vlerësuara financiarisht dhe publikuara nga ATP- ja, kanë të drejtë të paraqiten për të aplikuar. Ka dy mënyra, ose kompensim financiar, ose kompensim me tokë. Gjithsej janë 23 mijë hektarë tokë bujqësore, 50 mijë hektarë sipërfaqe pyjore dhe 170 objekte shtetërore, të cilat do të përdoren për kompensim fizik. Gazeta boton sot dokumentet që duhen për aplikimin. Në tabelat e emrave shpesh shfaqen shifra me minus. Kjo do të thotë se këta pronarë janë kompensuar gjatë viteve, ose i është kthyer tokë me vlerë më të madhe sesa vlera e tokës që pretendojnë. Duket si pa sens, por është pjesë e logjikës së ligjit të ri, i cili thotë se në rast se toka e kthyer, ose kompensimi i dhënë pas viteve 1990, është më i madh se sa vlera e tokës që pretendohet, atëherë pronari quhet i ezauruar, pra, nuk mund të pretendojë më kompensim.