Berisha flet për revoltë, Basha: ‘ Dëshmitarin X’ po e kërcënojnë, i janë ofruar 200 mijë euro
Basha: Kërcënimi nga të skeduar për vrasje nga zona e Vlorës dhe Fushë- Krujës
Kryetari i opozitës, Lulzim Basha, ka denoncuar tentativën që është bërë nga njerëz të afërt të ministrit Fatmir Xhafaj për të blerë “Dëshmimtarin X”, në këmbim të përgënjeshtrimit të deklarimeve të tij. Në një dalje për mediat në orët e vona të mbrëmjes, Basha deklaroi se i janë ofruar 200 mijë euro një familjari të Albert Veliut, për të kërkuar ndryshimin e dëshmisë së dhënë kundër vëllait të ministrit të Brendshëm, Fatmir Xhafaj.
“Në këtë orë të vonë të mbrëmjes jam para jush për të denoncuar thellimin e skandalit dhe skenarit kriminal të Edi Ramës dhe Fatmir Xhafajt, të cilët po përdorin shtetin e kapur dhe kanë hedhur në veprim strukturat e krimit të organizuar nën urdhrat e tyre për të kërcënuar dhe për t’i bërë presion “dëshmitarit x”, shtetasit Albert Veliu dhe familjarëve të tij. Të dërguarit e Fatmir dhe Agron Xhafajt, njerëz të skeduar për vrasje të tipit mafioz nga zona e Vlorës dhe e Fushë- Krujës i kanë ofruar një të afërmi të “dëshmitarit x”, Albert Veliu, 200 mijë euro nga paratë e pista që familja mafioze Xhafaj përfiton nga trafiku i drogës dhe veprimtari të tjera kriminale, që ai të përgënjeshtrojë deklarimet e bëra publike”, deklaroi Basha.
AKUZA Sipas kreut të opozitës, këto tentative të Ramës dhe Xhafajt e thellojnë akoma më tepër skandalin ku janë përfshirë. “Çdo përpjekje e Fatmir Xhafajt dhe Edi Ramës për të kërcënuar, intimiduar apo për të blerë “dëshmitarin x”, thjesht i zhyt edhe më thellë Fatmir Xhafajn dhe Edi Ramën në skandalin ku janë përfshirë kokë e këmbë. Plani për blerjen, kërcënimet ndaj dëshmitarit, intimidimi dhe sulmet ndaj gazetarit Jetmir Olldashi nxjerrin zbuluar frikën dhe përfshirjen e Fatmir Xhafajt dhe Edi Ramës në këtë veprimtari kriminale, për të mbuluar narkoaferën e Agron Xhafajt. Hartimi dhe zbatimi i këtij skenari të presionit shtetëror dhe mafioz është arsyeja e vetme pse Fatmir Xhafaj mbahet me thonj pas karriges së ministrit të Brendshëm”, u shpreh kreu i PD- së.
PARALAJMËRIMI Kryetari i opozitës paralajmëroi Kryeministrin Rama dhe ministrin e Brendshëm Xhafaj, se do të mbajnë përgjegjësi dhe do të marrin përgjigjen më të ashpër për çdo hap që do të ndërmarrin ndaj “dëshmitarit X”, Albert Veliu dhe gazetarit Jetmir Olldashi. “Duke dënuar ashpërsisht këto akte kriminale, dua t’i përsëris sot Edi Ramës dhe Fatmir Xhafajt paralajmërimin e prerë se për çdo hap që hedhin, për të vënë nën presion Albert Veliun, dëshmitarin e familjes mafioze Xhafaj, si dhe gazetarin investigativ Jetmir Olldashi, përgjegjës do të jenë ata dhe do të marrin përgjigjen më të ashpër nga opozita dhe populli. I parala- jmëroj sot, Edi Ramën dhe Fatmir Xhafajn, para gjithë shqiptarëve dhe para gjithë botës: ndal presionit mafioz ndaj dëshmitarit Veliu dhe gazetarit Olldashi”, tha Basha. Opozita ka paralajmëruar se do të paraqesë të tjera përgjime, që rëndojnë akoma më tepër pozitat e Fat- mir Xhafajt në krye të Ministrisë së Brendshme. Protesta e 26 majit, ka për qëllim largimin e Xhafajt nga institucioni i Ministrisë së Brendshme, pasi, sipas demokratëve, në asnjë vend të Europës nuk ka një drejtues të një institucioni kaq të rëndësishëm me vëlla të dënuar për trafik droge.