Amnisti për pensionet, kthehen 9.3 milionë lekë

Nga invalidët te minatorët, pensionistët që përfitojnë nga vendimi i djeshëm i Qeverisë për amnistinë: Do u kthehen 9.3 milionë lekë

Vitin e kaluar, Parlamenti miratoi një amnisti për pensionistët invalidë dhe minatorë, të cilët edhe pse merrnin pension, ishin në marrëdhënie pune.

Sipas ligjit, këta persona nuk duhet të merrnin pension në rast se ishin në punë. Dje, qeveria vendosi të falë detyrimet e këtyre personave dhe të kthejë mbrapsh, pra, të rimbursojë pagesat, që ata kanë bërë nga data 1 janar 2017 deri në maj të 2017. Por kush janë kategoritë që përfitojnë dhe sa para do të marrin. Kur është miratuar ligji, të dhënat tregojnë se, në të gjithë Shqipërinë janë konstatuar 260 minatorë në pension pleqërie dhe 1473 persona në pension invaliditeti, nga të cilët 626 invalidë të plotë dhe 847 invalidë të pjesshëm, të cilët kanë qenë të punësuar dhe kanë tërhequr pensionet. ISSH sqaron se “Invalidët e plotë kanë rekomandim nga Komisioni Mjekësor që të mos punojnë, pra, nuk mund të pranohen në punë, ndërkohë që invalidët e pjesshëm mund të punojnë, por me orar të reduktuar apo duhet të ndryshojnë vendin e punës. Nga të dhënat e konstatuara nga sigurimet shoqërore rezulton se pjesa më e madhe e këtyre personave kanë gjendjen shëndetësore të tillë, që nuk i lejon të punojnë, por vështirësitë ekonomike, masa e ulët e pensionit të invaliditetit, i ka detyruar këta persona të punojnë, kryesisht të siguruar me pagë minimale dhe gjatë kësaj kohe kanë tërhequr edhe pensionin. Gjithashtu, është edhe kategoria e invalidëve të pjesshëm, të cilët duhet të punonin me orar të reduktuar dhe mund të përfitonin pensionin, por ulja e pagës do të ndikonte dukshëm në gjendjen e tyre ekonomike dhe kanë vijuar të punojnë edhe kundër rekomandimeve mjekësore, me orar të plotë”.

SA PËRFITOJNË Në vendimin e djeshëm të qeverisë parashikohet që ISSH , brenda një muaji nga data e hyrjes në fuqi të këtij vendimi, të falë detyrimet dhe të kthejë shumat e detyrimit të falur, por të paguara, nga data 1 janar 2017 deri më datën kur ka hyrë në fuqi ligji i vjetshëm i faljes, në maj të 2017. Por sa para pagua- nin minatorët dhe invalidët që pavarësisht se merrnin pension, edhe punonin. Sipas ligjit, ISSH i mbante atyre, në rastet kur zbuloheshin se merrnin edhe pension, edhe punonin, 50 për qind të shumës së pensionit. Por duke qenë se bëhet fjalë për kategori shumë të varfra, qeveria ka vendosur t’ua falë këtë detyrim, si dhe t’u kthejë paratë e mbajtura gjatë kësaj periudhe. “Efektet financiare, në shumën 9.352.000 lekë, të nevojshme për kthimin e shumave të detyrimeve të paguara nga përfituesit për periudhën janar– maj 2017, të përballohen nga buxheti i Sigurimeve Shoqërore të vitit 2018”, thuhet në vendimin e qeverisë. Pra, një muaj pas këtij vendimi, pensionistët invalidë dhe ata minatorë, që kanë punuar dhe kanë marrë pension, do të rimbursohen për paratë që u janë mbajtur nga pensioni, si dhe do u falen të gjitha detyrimet e tjera. Në ligjin e miratuar vjet, bëhej fjalë për një detyrim, prej mesatarisht 300 mijë lekësh për person.