Meta në Maltë: Të mësojmë nga modeli i tyre ekonomik
“Për të fuqizuar sektorët më vitalë si turizmi, agro- industria, etj”
Presidenti Meta mori pjesë në ditën e dytë të Forumit të Biznesit Maltë- Shqipëri. Presidenti Meta prezantoi shkurtimisht zhvillimet ekonomike, potencialin e bashkëpunimit të biznesit dhe oportunitetet e investimeve për biznesin maltez në Shqipëri.
Presidenti i Republikës theksoi se nga historia e suksesit e “modelit ekonomik” të Maltës, Shqipëria mund të nxjerrë leksionet e duhura për të fuqizuar sektorët më vitalë për zhvillimin ekonomik të qëndrueshëm, siç janë turizmi, agro- industria, shërbimet financiare, ICT, etj.. Nga ana tjetër, Dhoma e Tregtisë dhe Industrisë së Gozos shfaqi interes të madh në shkëmbimin e eksperiencave me përfaqësuesit e komunitetit biznesit shqiptar dhe eksplorimin e projekteve të biznesit në tregun shqiptar dhe atë rajonal. Forumin e Biznesit e përshëndetën dhe ministri maltez i Ekonomisë dhe Biznesit e Vogël, Cardona dhe ministrja për Gozon, Caruana, të cilët vlerësuan Forumin si platformën e du- hur për të njohur më mirë potencialet tona ekonomike dhe për të krijuar sinergjinë e nevojshme mes biznesit maltez dhe atij shqiptar për investimet e ndërsjellta. Në përfundim të Forumit u nënshkrua një marrëveshje bashkëpunimi mes Presidentit të Dhomës së Tregtisë dhe Industrisë së Tiranës, Nikolin Jaka dhe Presidentit të Dhomës së Tregtisë dhe Industrisë së Gozos, Joseph Grech. Gjatë punimeve të Forumit, Presidenti Meta zhvilloi takime edhe me rektorin e Universitetit të Maltës, prof. Alfred. J. Vella dhe me drejtuesit ekzekutivë të Air- Malta. Në takime u diskutua për bashkëpunimin në fushën e arsimit, me fokus kryesor programet e shkëmbimeve studentore në Maltë dhe Shqipëri, si dhe mundësinë për dhënien e disa bursave në nivelin pasuniversitar për studentët shqiptarë në Universitetin e Maltës. Nga ana tjetër, përfaqësuesit e Air- Malta shprehën interes për të vlerësuar mundësinë e vendosjes së linjës direkte mes Maltës dhe Shqipërisë.