Skenarët e protestës së PD, Basha: Bashkohuni kundër qeverisë së krimit
Opozita do të protestojë këtë të shtunë në bulevardin “Dëshmorët e Kombit” për largimin e ministrit të Brendshëm, Fatmir Xhafaj. Pas publikimit të përgjimeve dhe intervistës së “Dëshmitarit X” për vëllain e Fatmir Xhafajt, demokratët pritën për 48 orë një qëndrim nga Kryeministri Rama, i cili ndryshe nga bindja, që kishin demokratët, nuk e shkarkoi dhe doli në mbrojtje të ministrit të Brendshëm. Basha thirri dje në selinë blu, deputetët e PD- së në Tiranë dhe krerët e degëve lokale në kryeqytet, për të dhënë udhëzime për organizimin e protestës. Burime nga selia blu bëjnë me dije se Basha ka kërkuar një pjesëmarrje masive në protestë, duke kërkuar që çdo anëtar i PD- së të trokasë derë më derë, për të ftuar qytetarët të protestojnë. Basha do të organizojë edhe disa takime ditën e premte, për të vendosur përfundimisht për mbarëvajtjen që do të ketë protesta, por disa prej deputetëve demokratë kanë deklaruar se do të jenë në shesh bashkë me familjen, për të paralajmëruar se dhuna nuk është skenar. Kreu i PDsë, Lulzim Basha, i bëri thirrje qytetarëve të jenë në bulevardin “Dëshmorët e Kombit” këtë të shtunë, në protestën kombëtare të opozitës. “E vetmja forcë që mund ta ndalë këtë të keqe është bashkimi ynë. E vetmja forcë që mund ta mposhtë këtë të keqe është bashkimi ynë. Ju ftoj të gjithëve të bashkohemi në protestën kombëtare të 26 majit për një Shqipëri të çliruar nga qeveria e lidhur me krimin. Për një Shqipëri të çliruar nga qeveria antipopullore e Edi Ramës, që ka tradhtuar interesat e qytetarëve duke bashkëpunuar haptas me krimin për pushtetin dhe pasurinë e tij. Për një Shqipëri të çliruar nga qeveria antieuropiane, që me rekordet e saj të bashkëpunimit me krimin dhe korrupsionin, është kthyer në pengesën për ëndrrën e të gjithë shqiptarëve për Shqipërinë si gjithë Europa”, tha Basha.