Negociatat me BE, Xhafaj dhe kryebashkiaku Veliaj për lobim në Holandë
Veliaj takon kryebashkiakun e Roterdamit, Ahmed Aboutaleb: Shqipëria e meriton hapjen e negociatave për integrimin në BE
Ministrat, Gjonaj dhe Xhafaj, bashkë me kryebashkiakun Veliaj kanë zhvilluar takime në Holandë në mbështetje të hapjes së negociatave të Shqipërisë me BE- në.
Gjonaj dhe Xhafaj morën pjesë në një seancë dëgjimore në Komisionin për Drejtësi dhe Siguri të Parlamentit të Holandës. Ministrja Gjonaj vlerësoi ecurinë e Reformës në Drejtësi dhe rëndësinë e krijimit të një sistemi gjyqësor transparent, të pavarur, të paanshëm dhe efecient në funksion të zhvillimit të shtetit të së drejtës dhe zhvillimin ekonomik të Shqipërisë. Ajo vlerësoi Holandën për asistencën teknike dhe financiare të ofruar që nga fillimi i kësaj reforme, si dhe në zbatimin e saj. Në përgjigje të çështjeve të ngritura nga parlamentarët, u bëri me dije rezultatet e deritanishme të vetingut, si dhe besimin e saj që procesi i vetingut për 57 gjyqtarë dhe prokurorë të listës prioritare do të përfundojë shumë shpejt, duke sjellë ngritjen e institucioneve të reja me kandidatë të pastër dhe të vetuar, procese këto që ndikojnë në rikthimin e besimit të qytetarëve te sistemi i drejtësisë.
Kriminaliteti shqiptar në Holandë ishte një tjetër çështje e ngritur nga parlamentarët në këtë takim. Në përgjigje të saj, ministri Xhafaj u shpreh se “ne e njohim këtë shqetësim dhe kemi gjithë vullnetin e duhur për ta adresuar atë”. “Për vetë natyrën e këtij kriminaliteti, bashkëpunimi ndërmjet dy vendeve tona, është mëse i domosdoshëm. Shpesh, çështje të tilla mediatizohen dhe ndikojnë në perceptimin e publikut, megjithatë, ministri u bëri atyre me dije sem sipas statistikave zyrtare holandeze, në burgjet holandeze ndodhen vetëm 64 shtetas shqiptar, pjesa dërrmuese e të cilëve ndodhen në paraburgim. Pra, është mëse e do- mosdoshme që të dy palët të zhvillojnë analiza dhe hetime të përbashkëtam bazuar në të dhëna konkrete dhe jo në perceptime”.
Kryetari i Bashkisë së Tiranës, Erion Veliaj, i shoqëruar edhe nga ministri i Punëve të Brendshme, Fatmir Xhafaj dhe ministrja e Drejtësisë, Etilda Gjonaj, u takuan dje me kryetarin e Bashkisë së Roterdamit, Ahmed Aboutaleb. Në takim morën pjesë edhe zyrtarë të tjerë të lartë të institucioneve ligjzbatuese holandeze. Veliaj theksoi se Shqipëria e meriton hapjen e negociatave për integrimin në BE, pasi ka bërë reforma të mëdha në forcimin e shtetit ligjor dhe në zhvillimin ekonomik të vendit. “Kemi bërë një punë të jashtëzakonshme, duke filluar nga Kryeministri deri tek autoritetet më modeste lokale, për të krijuar një Shqipëri evropiane, nga Reforma në Drejtësi, te mënyra se si menaxhohen territoret, përgatitjet për turizmin dhe publiciteti pozitiv që Shqipëria po merr nga mediat ndërkombëtare, të cilat kanë akses në atë që realisht po ndodh në Shqipëri. Besoj se ka ardhur koha që ashtu siç kemi prezantuar në Holandë imazhin e një Shqipërie të re, të një Tirane të re, të një qeverie dhe të një bashkie që po lufton për të prodhuar një rezultat në një vend dinjitoz europian, ashtu do të duhet të vazhdojmë përtej ndasive tona politike”, u shpreh Veliaj. Pas takimeve, ai u shpreh optimist për mbështetjen e propozimit të Komisionit Europian për hapjen e negociatave të anëtarësimit. “Ishte një moment i mirë për të treguar këtë kartolinë të Shqipërisë, që sigurisht ka halle, probleme dhe sfida, por që po bën në kohë rekord reforma që nuk janë bërë në vite të tëra. Besoj se konfirmimi në bllok që morëm nga dëgjuesit tanë, qoftë në takimet zyrtare apo edhe në takimet akademike e diplomatike, na dëshmon se kemi një kauzë të vërtetë për të mbrojtur, teksa kërkojmë që Shqipëria të fillojë negociatat për Bashkimin Europian. Kjo është një ditë e mirë për Shqipërinë edhe këtu në Hollandë”, shtoi Veliaj.