Qendrat shëndetësore, Manastirliu: Brenda mandatit rikonstruktojmë 300
Fuqizimi i kujdesit parësor në vend është një prej synimeve kryesore të qeverisë në këtë 4- vjeçar. Ministria e Shëndetësisë ka piketuar qendrat shëndetësore në rrethet e Shqipërisë, që do të rehabilitohen brenda këtij mandati. Nga Picari i Gjirokastrës, teksa inspektoi qendrën e re të saporikonstruktuar, ministrja e Shëndetësisë dhe Çështjeve Sociale, Ogerta Manastirliu, bëri me dije shifrën totale të poliklinikave që do të ndryshohen tërësisht në tre vitet që vijnë. “Kemi nisur programin kombëtar të rehabilitimit të 300 qendrave shëndetësore në këtë mandat. Vetëm për vitin 2018 do të rehabilitojmë 80 qendra shëndetësore, nga veriu në jug të vendit. Si asnjëherë më parë, investojmë për fuqizimin e kujdesit parësor, duke kthyer vëmendjen te rëndësia e mjekut të familjes dhe ofrimi i kujdesit shëndetësor me standarde në qendrat shëndetësore”, vuri në dukje ministrja. Sipas Manastirliut, Qarku i Gjirokastrës është një nga përfituesit më të mëdhenj të investimit të qeverisë, pasi vetëm për këtë vit, pritet të rehabilitohen tërësisht 8 qendra shëndetësore. Qendra Shëndetësore e Picarit në Gjirokastër, që vizitoi ministrja, një ditë më parë, ka pësuar një transformim rrën- jësor, duke u kthyer nga një ngrehinë e degraduar ndër vite, në një qendër model të kujdesit parësor dhe që iu vjen në ndihmë 1600 banorëve të kësaj zone. Paralelisht, po punohet edhe për rikonstruksionin e qendrave të tjera në rrethe, nga veri në jug të vendit. Pak javë më parë, u përuruan dy të tilla në Dibër, duke i pajisur jo vetëm me infrastrukturën e duhur, por edhe me pajisje. Mjekët e familjes në Qarkun e Dibrës janë pajisur me “Çantën e doktorit”, e cila përmban 17 instrumente mjekësore, shumë të nevojshme për ofrimin e ndihmës së parë për urgjencat në territor.