Zbardhet vendimi për Frrokun, Gjykata: Është rehabilituar

Gjykata e Fierit ka zbardhur vendimin për lirimin e parakohshëm me kusht të ish- deputetit Mark Frroku. Ky i fundit ishte dënuar nga Gjykata e Tiranës për "fshehje të pasurisë" dhe "ndërtim të paligjshëm" me 6 vjet burg. Mirëpo, ish- deputeti, duke qenë se vuante dënimin në Burgun e Fierit, i është drejtuar Gjykatës atje me kërkesë për lirim të parakohshëm me kusht. Gjyqtarja Matilda Shalla ka vendosur ta lirojë me kusht Frrokun, më 9 maj, ndërsa Prokuroria e ka apeluar vendimin. Sipas Prokurorisë së Fierit, Frroku nuk i plotësonte kushtet për t'u liruar me kusht, pasi duhej të kryente edhe një vit e pesë muaj burgim që të lirohej. Vendimi për Frrokun është dhënë vetëm pas tri seancash nga Gjykata e Fierit dhe, konkretisht, nga gjyqtarja Matilda Shalla. "Panorama" siguron vendimin e plotë të gjyqtares Shalla, në të cilin arsyetohet si më poshtë:

"1- Gjatë intervistave me punonjësin e Shërbimit të Provës shprehet i penduar për veprën e konsumuar. Ai është i ndërgjegjësuar për veprën dhe dënon veprimin e tij, çka tregon se ky i dënuar është rehabilituar dhe është i gatshëm për t'u riintegruar në shoqëri. 2- Gjatë vuajtjes së dënimit, i dënuari ka shfaqur sjellje kor- rekte me bashkëvuajtësit, si dhe me punonjësit e IEVP Fier, duke respektuar rregulloren e ligjet në fuqi, duke treguar që është arritur qëllimi i edukimit të tij.

3- Nga vërtetimi i gjendjes gjyqësore figuron se, i dënuari Mark Frroku nuk ka qenë më parë i dënuar.

4- I dënuari do të fillojë punë në aktivitetin e tij privat, gjë e cila ndihmon në rehabilitimin e shpejtë të të dënuarit në shoqëri. 5- I dënuari nuk rezulton të ketë probleme me përdorim e alkoolit apo të lëndëve narkotike, faktor i cili ndikon në procesin e riintegrimit të të dënuarit në shoqëri dhe shërben si një faktor parandalues në kryerjen e sjelljeve devijante në shoqëri.

6- I dënuari do të kujdeset për familjen e tij, duke qenë se nuk ka asnjë njeri tjetër për t'u qëndruar pranë në jetën e përditshme.

7- I dënuari do të kujdeset për bashkëshorten e tij, e cila është e sëmurë dhe në gjendje të rëndë. 8- I dënuari është tip i qetë dhe i qëndrueshëm emocionalisht dhe me shumë shpresë për t'u rikthyer pranë familjes. 8- Lidhur me konsultimin e dokumenteve dhe materialeve të dosjes së të dënuarit si dhe nga intervista me të, rezulton se i dënuari ka mbështetjen e plotë të familjes dhe të shoqërisë. Fakt, i cili ndikon pozitivisht tek riintegrimi i të dënuarit në shoqëri".