Grabitja e Prokurorisë, dy të dyshuar u zbuluan nga kamerat
Autorët u zbuluan me prova, u fiksuan nga kamerat e bizneseve
Policia e Durrësit arrestoi dje dy personat e dyshuar për vjedhjen e materialeve në Prokurorinë e këtij rrethi, si dhe rojën që ka qenë në turn për ruajtjen e këtij institucioni.
Sipas Policisë, në pranga përfunduan shtetasit Nias Lena, 56 vjeç, roje private, i caktuar me shërbim në orarin kur janë vjedhur zyrat e Prokurorisë, Artur Isa, 49 vjeç, banues në Sukth i Ri, me precedentë penalë të mëparshëm dhe Besnik Bushi 54 vjeç, banues në Durrës, me precedentë penalë të mëparshëm. Roja i Prokurorisë është ndaluar për shpërdorim detyre, ndërsa ndaj dy shtetasve të tjerë rëndon akuza e “Ndërhyrja në sistemet kompjuterike” dhe “Zhdukja ose humbja e fashikullit” në bashkëpunim. Ata dyshohet se kanë hyrë në zyrat e Prokurorisë dhe kanë vjedhur dhe dëmtuar dokumentet, si dhe kanë ndërhyrë në sistemin kompjuterik.
IDENTIFIKIMI Kamerat e sigurisë së bizneseve, që ndodhen rreth organit të akuzës, tradhtuan autorët e vjedhjes dhe bastisjes së Prokurorisë së Durrësit, ngjarje e ndodhur në orët e para të mëngjesit të ditës së enjte. Autorët shkatërruan serverin e kamerave të sigurisë së institucionit që bastisën duke menduar se nuk kishin lënë asnjë gjurmë, por nuk morën parasysh faktin që organi i akuzës ishte rrethuar nga biznese private dhe studio avokatie, të cilat kishin instaluar kamera sigurie. Pasi mblodhën dhe verifikuan pamjet e fiksuara nga kamerat e bizneseve, Policia e Durrësit ka ndaluar dy autorët e dyshuar të vjedhjes së zyrave të Prokurorisë dhe po ashtu ka ndaluar edhe rojën private të SHPSF nën akuzën për shpërdorim detyre. Sipas Policisë, në pranga përfunduan Nias Lena, 56 vjeç, banues në Durrës, roje private, i caktuar me shërbim në orarin kur janë vjedhur zyrat e Prokurorisë, Artur Isa, 49 vjeç, banues në Sukth i Ri, me precedentë pe- nalë të mëparshëm dhe Besnik Bushi 54 vjeç, banues në Durrës, me precedentë penalë të mëparshëm. Këta të fundit dyshohet se kanë hyrë në zyrat e Prokurorisë dhe kanë vjedhur e dëmtuar dokumentet, si dhe kanë ndërhyrë në sistemin kompjuterik. Të arrestuarit dyshohen për “Shpërdorim detyre” në ngarkim të shtetasit Nias Lena, si dhe “Ndërhyrje në sistemet kompjuterike” dhe “Zhdukje ose humbje e fashikullit” në bashkëpunim në ngarkim të shtetasve Isa dhe Bushi.
HETIMET Grupi hetimor në drejtimin e prokurorit Drini Pali po punon për të zbardhur vjedhjen dhe bastisjen e organit të akuzës. Mësohet se dy personat e arrestuar janë të skeduar më herët nga Policia për të njëjtën vepër penale, atë të vjedhjes dhe vjedhjes me dhunë. “Identifikimin e tyre e bëmë të mundur nëpërmjet provave shkencore. Autorët kanë lënë gjurmë. Ata janë fiksuar nga kamerat e sigurisë së bizneseve që ndodhen pranë Prokurorisë. Megjithatë, ata vetë nuk pranojnë të kenë kryer vjedhjen, por ne jemi të sigurt se autorët e kësaj ngjarjeje të paprecedente janë pikërisht Isa dhe Bushi”, thanë burimet nga Policia e Durrësit. Dyshohet se Isa dhe Bushi kanë pasur për qëllim shkatërrimin e provave për dosjet e abuzimit me pronat në vijën bregdetare. Sipas burimeve nga Prokuroria, dy autorët kryen vjedhjen për llogari të një personi tjetër, që ka një proces të hapur hetimor për tjetërsimin e pronave në bregdet.