Përgjimi, Xhafaj sfidon Bashën: Iki po doli e vërtetë
"Nëse provohet e kundërta, duhet të dorëhiqet Lulzim Basha"
Ministri i Brendshëm, Fatmir Xhafaj, ka sfiduar kryetarin e opozitës, Lulzim Basha, një ditë para protestës së ditës së shtunë.
Në një mesazh në "Twitter", Xhafaj ka thënë se është i gatshëm të japë dorëheqjen nëse provohen akuzat e opozitës për audio- përgjimin mes Albert Veliut dhe vëllait të tij, Agron Xhafaj. Por në rast të kundërt, ministri i Brendshëm ka kërkuar që dorëheqjen duhet ta japë kryetari i Partisë Demokratike.
"E vërteta është një dhe vetëm një në këtë rast. Ai që nuk është në anën e së vërtetës, duhet të përgjigjet. Këtë e kërkon interesi i ligjshëm i qytetarëve. Drejtësi deri në fund.
Nëse provohet e kundërta, atëherë duhet që Lulzim Basha të dorëhiqet dhe të përballet me ligjin. Pyeteni: A është ai i gatshëm për këtë sfidë?", shkruante dje Xhafaj. Më tej, ministri i Brendshëm u është drejtuar me një mesazh shqiptarëve, të cilët janë thërritur nga PD në protestë. Sipas tij, nëse akuzat e PD- së do të rezultojnë të vërteta, atëherë ai do të largohet nga funksioni i ministrit dhe do të mbajë përgjegjësi morale dhe ligjore. "Bashkëqytetarëve të thirrur në protestë u them sot: Nëse audio- përgjimi i bërë publik nga PD do të rezultojë i vërtetë, unë do të marr çdo përgjegjësi morale, politike e ligjore, përfshi dhe largimin nga funksioni i ministrit të Brendshëm. Jam i gatshëm ta bëj këtë pa hezitim", shkruan Xhafaj.
HETIMI
Prokuroria e Krimeve të Rënda ka dërguar në Itali përgjimin ndaj vëllait të ministrit të Brendshëm, Fatmir Xhafaj. Kështu, burimet thonë se përgjimi është dërguar përmes një letërporosia, çka do të thotë se do të jenë autoritetet italiane ato që do të kryejnë ekspertizën e përgjimit, nëse është i manipuluar ose jo. Procedimi penal për përgjimin e publikuar nga Partia Demokratike është regjistruar më 17 maj, pra, tri ditë pas publikimit të tij në media. Ky procedim, sipas Prokurorisë, është regjistruar për veprën penale të "Trafikimit të narkotikëve", një javë pasi nisi verifikimet për akuzat e PD- së ndaj Agron Xhafajt. Gjithashtu, Prokuroria e Krimeve të Rënda ka nisur edhe hetim pasuror për Agron Xhafajn, në kuadër të ligjit antimafia. Por Prokuroria nuk tha asgjë nëse ky hetim pasuror përfshin edhe ministrin Xhafaj, si familjar i Agronit. Hetimet po kryhen nga i njëjti prokuror, edhe për kallëzimin e Agron Xhafajt ndaj tri zyrtarëve të PD- së për "Kallëzim të rremë". Pritet që brenda muajit që vjen, të ketë një përgjigje për ekspertizën e përgjimit nga pala italiane. Deri më tani janë marrë në pyetje të gjithë aktorët që lidhen me përgjimin, që nga "Babalja" deri te zyrtarët e PD- së që e bënë publik përgjimin. Megjithatë, çështja është shume sensitive për arenën politike.