Arratisja nga Gjykata, lirohen 2 policët e Burgut
Prokuroria kërkoi garanci pasurore, vendoset “detyrim paraqitje”
VLORE- Gjykata e Vlorës ka vendosur masën e sigurisë me “detyrim paraqitje”, për dy punonjësit e Policisë së Paraburgimit, të cilët ndodheshin në sallën e gjyqit kur ndodhi arratisja e të dënuarit Mikel Kasaj. Efektivët Gjolek Hodaj dhe Granit Zani akuzohen për “shpërdorim detyre”, pasi gjatë procesit gjyqësor të ditës së mërkurë, ata nuk arritën dot të shmangnin arratisjen e 29- vjeçarit, i cili në momentin që po lexohej vendimi nga trupa gjykuese ndodhej pa pranga. Të dy punonjësit e Policisë së Paraburgimit Vlorë u arrestuan ditën e mërkurë, datë 23 maj rreth orës 22: 00, ndërsa ndaj tyre është marrë tashmë edhe masa e shkarkimit nga detyra. Hodaj dhe Zani dolën dje para Gjykatës nga ku iu komunikua edhe masa e sigurisë. Prokuroria kërkoi garanci pasurore në vlerën 300 mijë lekë të reja për secilin, por Gjykata vendosi vetëm masën e sigurisë “detyrim paraqitje”, duke i lënë të lirë të dy punonjësit e Policisë së Paraburgimit. Seanca gjyqësore u drejtua nga gjyqtari Hektor Sinanaj, ndërsa prokurore e çështjes ishte Elona Alvoraj. Mikel Kasaj, 29 vjeç, arriti të arratisej nga salla e gjyqit ditën e mërkurë, në katin e dytë të ambienteve të Gjykatës në momentin kur sapo gjyqtari i çështjes dha vendimin për dënimin e tij me 3.4 vite burg për veprën penale të “Heqje e paligjshme e lirisë”, kryer në bashkëpunim. Pavarësisht se në momentin e arratisjes së tij është tentuar kapja nga punonjësit e Policisë, por edhe persona të tjerë të ndodhur në ambientet e Gjykatës, 29vjeçari Kasaj ka mundur të largohet nga salla e gjyqit. Ai kapërceu tavolinën, ku ngjitur me të ndodhej avokati mbrojtës. Pas tij ndodheshin dy efektivët, të cilët janë gjendur të papërgatitur. Ndonëse reagimi i tyre ka qenë i shpejtë, kanë mjaftuar vetëm pak sekonda veprimi, që ai të mund të shkëputej dhe t’u shpëtonte prangave. Në harkun e 19 sekondave, Kasaj ka përshkuar korridorin e Gjykatës, ka zbritur me vrap shkallët që nga kati i dytë dhe më tej është gjendur në oborr të këtij institucioni. Ai ka marrë drejtimin drejt “Sheshit të Flamurit”, ku edhe ka mundur të humbë gjurmë duke u futur rrugicave, i favorizuar edhe nga mungesa e prangave në duar. Burime nga Policia e Vlorës kanë konfirmuar se po vijohet të kërkohet për vendndodhjen e 29vjeçarit. Ka dyshime se ai po ndihmohet nga të afërm të tij për ta strehuar atë.