Shpërndante heroinë në gjimnaze, arrestohet vajza 26- vjeçare
TIRANE - Gjimnazistëve në Tiranë nuk u shitet vetëm kanabis, siç jemi mësuar të dëgjojmë nga dhjetëra raste arrestimesh të kryera nga Policia për këtë qëllim. Operacioni i radhës i Antidrogës së Kryeqytetit ka goditur një grup që shpërndante drogë më të fortë, siç është heroina. Tre persona janë arrestuar nga oficerët e Antidrogës, mes tyre edhe një vajzë 26- vjeçare, e cila është kapur në flagrancë pranë një shkolle të mesme te Rruga e Dibrës, me 5 doza lëndë narkotike të llojit heroinë, të gatshme për shitje. Pas arrestimit të saj, në pranga përfunduan edhe dy persona të tjerë, të dënuar më parë për vjedhje. “Goditet një grup që shpërndante lëndë narkotike në afërsi të shkollave të mesme të kryeqytetit. Arrestohen në flagrancë 3 shtetas. Sekuestrohen doza me lëndë narkotike të llojit heroinë”, njoftoi dje Policia e Tiranës. Sipas burimeve zyrtare të Policisë, specialistët për Hetimin e Narkotikëve të Policisë së Tiranë, në kuadër të një operacioni policor, arrestuan në kushtet e flagrancës shtetasit: Enri Manaj, 35 vjeç, Marjus Filipi, 34 vjeç dhe 26- vjeçaren Gloria Hasaj. “Në bazë të informacioneve të marra në rrugë operative se shtetasit e mësipërm në bashkëpunim me njëritjetrin kryenin aktivitetin e kundraligjshëm të shitjes së lëndëve narkotike në shkollat e mesme të kryeqytetit, nga Seksioni i Narkotikëve u organizua puna për kapjen e tyre në flagrancë. Shtetasit Enri Manaj dhe Gloria Hasaj janë konstatuar nga shërbimet e Policisë para hyrjes së një shkolle të mesme në Rrugën e Dibrës dhe gjatë kontrollit fizik të ushtruar ndaj shtetases Gloria Hasaj, i janë gjetur 5 doza të dyshuara me lëndë narkotike të llojit heroinë, e ndarë në porcione gati për t’u shitur”, tha Policia. Gjithashtu, gjatë kontrollit të ushtruar në banesën e shtetasit Enri Manaj, në të cilën ndodhej shtetasi Marjus Filipi dhe shtetasja e huaj filipinase me iniciale C. M., u gjetën dhe u sekuestruan 39 doza lënde narkotike e dyshuar heroinë. Janë sekuestruar në total në cilësinë e provës materiale 44 doza lënde narkotike e llojit heroinë dhe 3 celularë. Policia tha se në bashkëpunim me Drejtorinë e Kufirit dhe Migracionit, po kryhen veprimet përkatëse për dëbimin e shtetases filipinase, pasi u konstatua se po qëndronte pa leje qëndrimi në territorin e Republikës të Shqipërisë.