Pranimet e reja, zbardhen kuotat për Ekonomikun
Rreth 1300 studentë të rinj në bachelor, tarifat e pandryshuara
Një prej fakulteteve më të kërkuara për maturantët ndër vite, Ekonomiku do të presë vitin e ardhshëm akademik 1280 studentë për studimet bachelor.
Ky është propozimi i departamenteve të këtij fakulteti. Dokumenti i siguruar nga gazeta me kuotat e pranimeve për 2018- 2019 është dorëzuar në Ministrinë e Arsimit, e cila e miraton në rast se ato rezultojnë në përputhje me kapacitetet pritëse të këtij fakulteti. Siç edhe shihet në tabelën përbri shkrimit, numri total e po ashtu dhe në programe të veçanta studimi për ciklin e parë të studimeve është i pandryshuar. Veç kësaj, drejtues të fakultetit bëjnë me dije se do t’i qëndrojnë besnikë gjithashtu edhe të njëjtave tarifa nga viti i kaluar. Sa i takon studimeve në ciklin e dytë, ka një ulje të lehtë të kuotave në master shkencor Ekonomiks, ndërsa pagesa për këto programe studimi ende nuk është vendosur. KUSHTET E PRANIMIT
Tashmë është bërë e udhës që përpara se kandidatët të plotësojnë formularin me dhjetë preferenca, të konsultohen më parë me kuotat dhe kriteret e pranimit për të hamendësuar paraprakisht nëse me rezultatet që kanë, hyjnë në dyert e fakultetit të preferuar ose jo. Ndër të parët që kanë bërë publike kriteret, që në muajin janar, Universiteti i Tiranës me gjashtë fakultetet e tij, specifikon peshën e komponentëve të Maturës në vlerësimin final të pikëve. Konkretisht, Fakulteti i Ekonomisë e ka ndarë këtë peshë midis rezultateve të përgjithshme të gjimnazit dhe katër lëndëve formuese. “Nota mesatare e shkollës së mesme për të gjitha vitet, përfshirë dhe provimet e Maturës Shtetërore ( mesatare e thjeshtë), të cilat përbëjnë 50% të vlerësimit. Nota mesatare e gruplëndëve ( për të gjitha vitet gjatë të cilave shtrihen lëndët, përfshirë notat e Maturës Shtetërore), të cilat përbëjnë 50% të vlerësimit: Matematikë 15%, Ekonomi 15%, Fizikë 10%, Gjuhë e Huaj 10%”, përcaktohet në dokumentin zyrtar të pranimeve në Fakultetin Ekonomik. Ndërkohë që mendojnë dhjetë preferencat, që do të plotësojnë në Formularin A2, maturantët për pak ditë nisin sezonin e provimeve, rezultati i të cilave bashkë me ato ndër vite është përcaktues për në universitet.