Vjedhja e Prokurorisë, dy të akuzuarit nuk e njohin njëri- tjetrin
Isai: Kam qenë në Prokurori si elektricist për të kryer disa instalime. S’kam lidhje me akuzën. Bushin nuk e njoh fare.
Artur Isa, 49 vjeç dhe Besnik Bushi, 54 vjeç, në bashkëpunim me Nias Lena, 56 vjeç, akuzohen si autorët që kanë bastisur zyrat e Prokurorisë së Durrësit katër ditë më parë.
Akuza dyshon se tre të arrestuarit janë përdorur nga organizatorët që cenuan rëndë sigurinë e Prokurorisë, pasi u dëmtuan disa dokumente si dhe serveri i kamerave të institucionit. Dy të ndaluarit u identifikuan nëpërmjet shenjave të gishtërinjve. Sipas prokurorit të çështjes Pali Decolli, Isa dhe Bushi kishin lënë shenja gishtërinjsh në ambientet e zyrës së prokurorit të Task- Forcës, Afrim Shehu, si dhe mbi kapakun plastik të serverit të kamerave të sigurisë. “Rezulton se në orën 06: 30 të mëngjesit të 24 majit, janë dëmtuar kamerat e sigurisë, ka ndërhyrje në sistemin kompjuterik, është hapur dera e server të IT- së. Janë gjetur 13 gjurmë kapilare. Gjurmët e gishtërinjve i përkasin Artur Isas dhe Besnik Bushit”, u bë e ditur nga organi i Akuzës. Nga ana e tyre, dy të arrestuarit nuk pranojnë të jenë autorët dhe mohojnë të kenë njohje me njëri- tjetrin. Besnik Bushi tha përpara togave të zeza në Gjykatën e Durrësit, se natën e ngjarjes ishte duke peshkuar në det, ndërsa ka deklaruar se kishte shkuar në Prokurori dy herë, më parë si elektricist dhe një herë kur e kishte thirrur një oficer i Policisë Gjyqësore, i cili po ndiqte rastin e tij, pasi akuzohej për vjedhje të energjisë elektrike. “Natën e ngjarjes kam qenë duke peshkuar me nipin dhe një shokun e tij në det. Kam ardhur vetëm dy herë në ambientet e brendshme të Prokurorisë, shtatë vite më parë kur punoja si elektricist dhe bëmë ca punime brenda Prokurorisë dhe dy vite më parë kur u paraqita pranë oficerit të Policisë Gjyqësore për një vjedhje për të cilën akuzohesha. Nuk e di se si kanë përfunduar shenjat e mija të gishtërinjve në ambientet e brendshme të Prokurorisë. Unë u habita kur erdhi dhe me arrestoi Policia. Nuk di çfarë të them, por nuk jam autor i kësaj vjedhjeje dhe nuk kam asnjë njohje me shtetasin Artur Isa”,- deklaroi shkurtimisht Besnik Bushi. Organi i Akuzës, përfaqësuar nga prokurorët Drini Pali dhe Pali Decolli, thanë në sallën e gjyqit se autorët kanë lënë gjurmë gishtërinjsh në ambientet e brendshme të institucionit gjatë vjedhjes dhe kanë dyshime serioze se ata janë autorët e vjedhjes, ndaj kërkuan të vlerësohej i ligjshëm arrestimi i tyre dhe si masë shtrënguese “arrest në burg”. Edhe për shtetasin Niaz Lena, me detyrë roje i policisë private, prokurorët kërkuan të njëjtën masë sigurie, pasi, sipas tyre, nuk ka kryer detyrën e tij. Për shkak të rrezikshmërisë së lartë që paraqesin, Prokuroria kërkoi të konsiderohet i ligjshëm arrestimi dhe heti- mi arrest me burg. Gjykata pranoi kërkesën e Prokurorisë dhe vendosi t’i lërë në burg dy autorët e dyshuar, Besnik Bushi 54 vjeç dhe Artur Isa 49 vjeç, si dhe rojën private Nias Lena 56 vjeç. Artur Isa dhe Besnik Bushi janë persona me precedent të mëparshëm penal. I pari është dënuar për vjedhje me dhunë në vitin 1997, ndërsa Bushi është dënuar me kusht për vjedhje të energjisë elektrike në vitin 2014. Ngjarja ndodhi në orët e para të së enjtes, ku autorët dëmtuan serverin qendror të Prokurorisë së Durrësit dhe morën dokumente hetimore në dosjen e prokurorit Afrim Shehu dhe një oficeri të Policisë Gjyqësore. Mes dokumenteve të vjedhura mësohet se janë shkresa të dosjes hetimore për skandalin e tjetërsimit të tokave në zonën e Ishmit. Një burim i hetimit tha se shkresat e dosjeve të tjera ishin hedhur në kosh dhe ishin lënë në mënyrë të çrregullt në zyrën e prokurorit të Task- Forcës. Ky i fundit po heton abuzimin me pronat në bregdet dhe ka në dorë dosje për disa institucione të rëndësishme siç është porti, dogana, bashkia, hipoteka, por edhe një sërë grupesh kriminale të cilët dyshohen se ushtronin aktivitetin e pastrimit të parave. Në largim, autorët kanë marrë edhe pajisjet CD ku janë regjistruar pamjet e kamerave të sigurisë gjatë kohës së vjedhjes.