Berisha: Revolta e së shtunës si 14 shtatori i ‘ 98
“Të revoltuarit, po mos i tërhiqte Basha, vendosnin flamurin mbi ministri”
Ish- Kryeministri Sali Berisha e ka cilësuar protestën e organizuar nga opozita këtë të shtunë nga më të fuqishmet në historinë e protestave kundër narkoshtetit. Sipas Berishës, nga protesta u larguan jashtë vendit disa prej ministrave dhe për nga fuqia, revolta e opozitës përsëriti pa dhunë dhe në një formë tjetër 14 shtatorin e vitit 1998! “Kjo revoltë, vetëm me frymën e fuqishme para saj i futi frikën deri në palcë dhe detyroi Edvinin të zhbëjë axhendën e tij në Tiranë, madje edhe me të huaj dhe t’ia mbathë natën e së premtes për në Velebisht, duke lëshuar kështu institucionin e Kryeministrisë për të mos rrezikuar lëkurën e tij. Vetëm për në Mal të Zi, sipas sistemit TIMS, të premten pasdite kaluan kufirin 5 prej tyre. Njerëzit që gogësijnë gjithë ditën pasuritë nga droga dhe vjedhja e taksapaguesve nuk kanë parim, moral apo atdhe! Në këtë aspekt, revolta e opozitës e datës 26 maj 2018 përsëriti pa dhunë dhe në një formë tjetër 14 shtatorin e vitit 1998! Opozitarët e revoltuar detyruan Fatziun, njërin nga dy ministrat, të qëndrojë në Tiranë, të lëshojë si mi zyrën dhe të largohet me vrap nga tuneli i narkoministrisë, duke menduar vetëm për lëkurën e tij dhe dëshmuar se njëlloj si padroni i tij nuk njeh detyrë as flamur”, shkruan Berisha. Sipas ish- Kryeministrit, vendimi i Bashës për të larguar protestuesit shmangu një histori të ngjashme me atë të 14 shtatorit 1998, pasi protestuesit ishin gati të hynin në institucion. “Në të vërtetë, pas zhdukjes së Fatziut, në përballjen e tyre me narkoPolicinë, të revoltuarit guximtarë po të mos i tërhiqte kryetari i PD- së në pak minuta do të vendosnin flamurin e fitores mbi ministrinë e drogës dhe krimit, njëlloj siç e vendosën më 14 shtator të vitit 1998 në Kryeministri”, shkruan Berisha.