Këshilli gjerman: Të hapen negociatat me Shqipërinë

“Asnjë vend tjetër në rajon s’ka bërë një përpjekje serioze për të reformuar drejtësinë”

Këshilli gjerman për Politikat e Jashtme, një forum i pavarur me shumë influencë në jetën politike gjermane, i propozon qeverisë gjermane mbështetjen e Shqipërisë në hapjen e negociatave me Bashkimin Europian.

Këshilli gjerman për Politikat e Jashtme është një strukturë që përfshin mbi 2500 figura të rëndësishme të jetës politike dhe akademike në Gjermani. Midis anëtarëve më të shquar të këtij Këshilli prestigjioz kanë qenë edhe ishpresidenti Richard von Veisaker dhe ish- ministri i Jashtëm, Hans- Dietrich Gensher. Në raportin e Këshillit gjerman për Politikat e Jashtme shprehet se Shqipëria duhet të shpërblehet për reformat që ka ndërmarrë, edhe pse jo gjithçka në Shqipëri shkon siç duhet, veçanërisht në fushën e sundimit të ligjit. “Përpjekjet e reformës duhet të shpërblehen. Përkundër këtyre të metave, është e drejtë të hapen negociatat e pranimit me Shqipërinë. Pas ndryshimeve të thella në Kushtetutë, qeveria po zbaton një reformë gjyqësore, që është shembull për të gjithë rajonin. Kritikët ankohen se deri më tani vetëm një numër i procedurave janë përfunduar dhe procesi pritet të zvarritet prej vitesh. Kjo kritikë është e justifikuar dhe me sa duket do të këtë argumente të ashpra rreth procedurave individuale”, thuhet në raport. Këshilli shprehet se hapja e negociatave me Shqipërinë do të ishte një mesazh pozitiv për të gjithë rajonin. “Duhet të pranojmë se asnjë vend tjetër në rajon nuk ka bërë një përpjekje serioze për të reformuar rrënjësisht sistemin e drejtësisë. Ky është një proces i pandalshëm dhe që krijon themelin për sukses në fusha të tjera kyçe, siç është lufta kundër korrupsionit dhe krimit të organizuar. Pikërisht për shkak se ajo është një qasje e tillë gjithëpërfshirëse për rinovimin demokratik, duke hapur ne- gociatat e pranimit, BE do të dërgojë një sinjal të qartë në rajon, se përpjekjet për të arritur sundimin e ligjit, do të shpërblehen drejtpërdrejt dhe në mënyrë të prekshme. Kjo do të ishte edhe më e rëndësishme në lidhje me Serbinë dhe Malin e Zi, të cilat tashmë janë duke negociuar”, thuhet në raport. Sipas Këshillit gjerman për Politikat e Jashtme, moshapja e negociatave do të sillte destabilizim për Shqipërinë. “Një ‘ jo’ nga Berlini, jo vetëm që do të destabilizonte Shqipërinë, por do të kishte një ndikim negativ në të gjithë rajonin e Ballkanit Perëndimor – dhe kështu do të kundërshtonte interesat e sigurisë së Gjermanisë. Një “po” e qartë nga Gjermania, e cila konsiderohet si një avokate e fortë e kushtëzimit të anëtarësimit, do të ishte një sinjal i fortë dhe do të vërë qeveritë në Paris dhe Hagë nën presion”, thuhet në raport. Por Këshilli gjerman për Politikat e Jashtme nuk lë pa nënvizuar dhe problematikat që ka shteti shqiptar.

“Jo vetëm fuqia ekonomike e vendit është shumë më poshtë mesatares së BE- së. Janë mbi të gjitha mangësitë në fushën e sundimit të ligjit, që shkaktojnë shqetësim për vendimmarrësit në Berlin dhe Bruksel. Ndërkohë që është bërë progres në luftën kundër korrupsionit, dënimi dhe arrestimi i zyrtarëve të lartë në veçanti, mbetet një përjashtim. E njëjta gjë vlen edhe për krimin e organizuar”, thuhet në raport.