Hapet sezoni i ri turistik, Frrokaj: Do të gjeni pastërti dhe rregull
LEZHE – Kryetari i Bashkisë së Lezhës, Fran Frrokaj, u është rikthyer daljeve publike pas arrestimit të bujshëm në mesin e muajit mars për abuzime me tokën në zonën e bregdetit në Shëngjin. Frrokaj ishte i pranishëm në ceremoninë e hapjes së sezonit turistik, që u organizua pikërisht në Shëngjin. Sheshi “Willson” u bë promovuesja e kulturës dhe mikpritjes për të gjithë ata që do të zgjedhin këtë bregdet për pushimet e kësaj vere. Koncerti festiv i mbrëmjes i dha larminë aktiviteteve të organizuara me këtë rast. Artistë të shumtë u ngjiten në skenën e vendosur në shesh, duke argëtuar qindra pushues që tashmë janë vendosur në Shëngjin për të shijuar freskinë e detit. Kreu i bashkisë, Fran Frrokaj, premtoi se gjithçka do të jetë më mirë se vitin e shkuar, ndërsa shtoi se në pikun e sezonit edhe infrastruktura rrugore do të jetë e përmirësuar. “Sivjet gjithçka do të jetë më e mirë nga vjet. Dhe vitin tjetër do të kemi përsëri një revolucion që të jetë gjithmonë kjo situata përsëritëse. Për emigrantët rruga e rikonstruktuar do të krijojë një farë kaosi për pushuesit, por pastaj do të jetë në një standard të pranueshëm. Ju garantoj se institucioni që unë drejtoj do të jetë në lartësinë e duhur për të ofruar kushte në të gjithë vijën bregdetare të Shëngjinit, me qëllim që pushuesit të gjejnë pastërti dhe rregull”, tha Frrokaj. Më tej, kreu i bashkisë foli për impulse të reja në administrimin e turizmit dhe me këtë rast prezantoi edhe administratorin e ri të Shëngjinit. Ky i fundit foli për angazhim maksimal, ndërsa kërkoi mbështetjen e çdo banori të Shëngjinit. “Do punojmë për të krijuar një mjedis sa më miqësor dhe të pastër për pushuesit. Unë kërkoj bashkëpunimin e çdo banori të Shëngjinit, që ta krijojmë këtë mundësi për pushuesit që ata të krijojnë pushime sa më të këndshme”, tha Gjok Caci. Në hapjen e sezonit turistik veror, Lezhës iu rikthye edhe “Hoteli i Gjuetisë”. Një prej zonave më të njohura në vend dhe sigurisht ndër më atraktivet, hapi dyert mbrëmjen e së shtunës për të qenë gjithnjë në shërbim të vizitorëve e turistëve. Krahas arkitekturës së rezidencës që i shërbeu ministrit të Brendshëm të Duçes, Kontit Ciano dhe diktatorit të pasçlirimit, natyra e kësaj zone do të jetë mundësi pa fund, ndërsa do të shijohen edhe pjatat më të mira që kjo zonë i ka servirur gjithnjë. e. h