FATION BINJAKU
Shkarkimi i Fatmir Xhafajt dhe plagosja e gazetarit Blendi Kasmi dominuan mbledhjen e Komisionit të Medias. Opozita edhe dje zbatoi strategjinë e saj të bllokimit të punimeve normale të komisionit, duke kërkuar nga socialistët që deri më datë 28 të largojnë ministrin e Brendshëm, Fatmir Xhafaj, i cili është i lidhur me krimin. Kreu i Grupit të PD- së, Edmond Spaho, tha dje se nuk kërkohet largimi i qeverisë Rama që të vijnë në pushtet demokratët, por largimi i ministrit të Brendshëm, në mënyrë që t’i hapet rrugë negociatave me Bashkimin Europian. “S’po kërkojmë ta lini ju qeverisjen dhe të vijmë ne. Por kërkojmë që qeverisja juaj të përfaqësohet me njerëz dinjitozë, që mos të kenë lidhje të tilla. I keni mundësitë që të keni njerëz të papërfshirë në trafik ndërkombëtar droge. Nuk është serioze për një vend që dy ministra të Brendshëm, njëri pas tjetrit, të jenë në një gjendje të tillë. Po kërkojmë që kjo të korrigjohet, në mënyrë që të hapen negociatat”, tha Spaho. Por gjatë mbledhjes, kryetarja e Komisionit të Medias, Albana Vokshi, është përplasur me deputetin e PS- së, Fidel Ylli. Biseda është shoqëruar me tone të larta, aq sa Ylli tha: “Moj, po do bërtas se jam sportist, jam me adrenalinë, ça jam unë, si pulë?”. “E ça pastaj se je sportist? Mos flisni absurditete”, iu drejtua Vokshi. Kryetarja e Komisionit të Medias kërkoi nga socialistët të distancohen nga dhuna ndaj gazetarit Blendi Kasmi. Por Fidel Ylli u tregua sërish i ashpër. “Ne do i mbrojmë gazetarët, por gazetarët duhet të bëjnë punën e tyre. Se janë vrarë deputetë në bulevard dhe ju s’jeni ndjerë. Po mo, po, janë plagosur, janë vrarë gazetarë në bulevard. E dini shumë mirë ju”, tha Ylli. Gjatë replikës, Albana Vokshi akuzoi socialistët se me mbrojtjen e Fatmir Xhafajt po mbanin peng hapjen e negociatave. “Hiqni Fatmir Xhafajn, ndalni dhunën, se vetëm kështu keni shans. Ju po na mbani peng të gjithëve”, tha dje Vokshi.