Arrestohet grupi i shqiptarëve, vodhën shtëpinë e Luis Suarez
SPANJE - Policia spanjolle ka vënë në pranga një grup kriminal, i cili kishin kryer më shumë se 30 vjedhje banesash në Barcelonë, përfshirë dhe shtëpinë e yllit të futbollit Luis Suarez. Sipas "El Pais", 8 prej tyre janë shqiptarë dhe ishin pjesë e një grupi që rekrutonin bashkëkombësit e tyre duke i strehuar dhe në këmbim u kërkonin të vidhnin shtëpi. Agjentët e Policisë ranë në gjurmët e grupit të shqiptarëve që në tetor të vitit të kaluar dhe mësohet se ata vidhnin shtëpi të shtrenjta larg qendrave të qytetit dhe për këtë përdornin makina të vjedhura. Në raste të tjera lëviznin në këmbë ose duke përdorur mjetet e transportit publik, ndërsa prisnin në pyll momentin e duhur për të realizuar vjedhjen e radhës. Sipas Policisë, grupi i kapur konsiderohen hajdutë të specializuar pasi merrnin masa paraprakisht dhe zgjidhnin me kujdes banesën ku do të hynin për të plaçkitur. "Në janar të këtij viti, ata vodhën shtëpinë e futbollistit të Barcelonës, Luis Suarez, duke hyrë në vilën e tij në Castelldefels, pa e ditur në fakt se ajo ishte shtëpia e futbollistit", thotë "El Pais", duke vjedhur një sasi bizhuterish me vlerë. Dy javë më parë, dy ditë pas nisjes së operacionit "Kojac", Policia spanjolle ka arritur të çmontonte bandën e shqiptarëve. Ndërsa futbollisti Luis Suarez ka falënderuar Policinë për kthimin e një pjese të plaçkave të vjedhura në banesën e tij, që janë disa bizhuteri, pajisje elektronike dhe çanta. Sipas mediave spanjolle, banda shqiptare ishte organizuar në tri grupe, duke lëvizur në autonomi me njëra- tjetrën, por që kanë vepruar si rrjet. Ata shkëmbenin midis tyre maki- nat e vjedhura për të kryer më pas grabitjet e banesave. Një nga liderët ishte një burrë tullac me ngjashmëri të fortë me Telly Savalas, aktori që luajti rolin e policit Teo Kojac, që shërbeu për të koduar operacionin. Ato ishin tri grupe të mirëorganizuara, të përbëra vetëm nga shqiptarët. Një nga anëtarët e grupit kishte funksionin e rekrutuesit dhe vendoste për përzgjedhjen e të rinjve në Shqipëri për t'i dërguar ata në Catalunya, ku duhej të kryenin vjedhjet.