Pakti i Xhafajt me Nikollën, oficerë policie për sigurinë në gjimnaze
Ministri i Brendshëm: Projekti për të garantuar siguri në mjediset shkollore, oficerët e Policisë edukatorë për zbatimin e ligjit
Ministri i Brendshëm dhe ministrja e Arsimit nënshkruan dje marrëveshjen për shtrirjen e projektit të oficerëve të sigurisë në të gjitha shkollat e mesme të Shqipërisë, që prej shtatorit të këtij viti.
Ky projekt u pilotua në 15 shkolla në Tiranë dhe garantoi një mjedis të sigurt për nxënësit. Oficerët e sigurisë do të shërbejnë për të garantuar më shumë siguri në mjediset e shkollave, për parandalimin e konflikteve dhe akteve të dhunshme. Për të ofruar siguri brenda komunitetit të nxënësve dhe parandalimin e çdo lloj veprimtarie kriminale në mjedisin rreth territorit të shkollave apo tentativave për të përfshirë të rinjtë në këtë lloj veprimtarie. Ministri i Brendshëm Fatmir Xhafaj deklaroi se nisja e projektit, nën kujdesin e veçantë të Kryeministrit Rama, synon ndërtimin e ambienteve shkollore më të sigurta. “Ne nuk dëshirojmë, nuk kemi pasur dhe nuk kemi kurrë si qëllim që të vendosim një polic, në kuptimin e vërtetë të kësaj fjale, por ne kemi si qëllim për të ofruar më shumë siguri që të vendosim këtu edukatorë me frymën e ligjit, edukatorë për zbatimin e ligjit, edukatorë për të parandaluar së bashku me trupën pedagogjike, në mënyrë të veçantë me psikologët e shkollave, për të parandaluar fenomene negative, akte të konflikteve apo të dhunës së brendshme. Akte të konflikteve apo të dhunës së brendshme, apo edhe përpjekje të jashtme për të implikuar dhe tërhequr nxënës të veçantë në shkolla të veçanta në rrugën e krimit”, u shpreh Xhafaj. Sipas tij, e trajtuar në këtë mënyrë në këtë lloj qasje, oficerët e sigurisë në shkolla brenda territorit të shkollës janë edukatorë, jashtë territorit të shkollës ata shërbejnë si pika lidhëse ndërmjet Policisë dhe shkollës. MINISTRJA NIKOLLA Ministrja e Arsimit, Lindita Nikolla, duke u ndalur në të dhënat e ofruara nga projekti pilot tha se janë shumë inkurajuese dhe pozitive. Vetëm brenda 10 javëve, sipas ministres Nikolla, oficerët e sigurisë kanë ndihmuar në zgjidhjen e 80 konflikteve brenda shkollave. “Një tregues tjetër që unë do të doja ta evidentoja është jo vetëm përcjellja e informacionit që kam marrë nga drejtuesit e shkollave, nga mësuesit dhe nga prindërit, por edhe një trend zbritës në rrafshin e konflikteve. Nëse shikojmë raportimet shumë serioze që vijnë dhe nga shkollat dhe nga oficerët e sigurisë, në javët e para numri i konflikteve ka qenë shumë më i madh, gjë që ka ardhur çdo muaj në zbritje, duke treguar edhe njëherë besimin në rritje, por ajo që është objektivi kryesor i këtij projekti, shkollat janë më të sigurta. Këto 15 modele na kanë shërbyer jo vetëm si modele për të treguar se sa i rëndësishëm ishte ky projekt midis dy ministrive tona, por patjetër janë modele që nevojshëm dhe mjaftueshëm garantojnë dhe kërkojnë që ne të vijojmë më tej, duke i shtrirë edhe në shkolla të tjera në të gjithë vendin”, u shpreh Nikolla.