Alarmi në PD, Basha konfirmon survejimin, tre deputetë në Polici
Çfarë iu tha kreu i opozitës deputetëve për survejimin, ultimatum kreut të Policisë, Veliut
Kryetari i opozitës, Lulzim Basha, pas publikimit të lajmit për survejimin e tij, thirri në një mbledhje urgjente në selinë blu deputetë të Komisionit të Ligjeve dhe Sigurisë Kombëtare.
Në shkrimin e publikuar nga “Panorama”, bëhej me dije se kreu i opozitës, Lulzim Basha, dhe një rreth i afërt i familjarëve të tij, prej disa kohësh mbahen nën survejim nga segmente të Policisë Operacionale. Në mbledhjen me dyer të mbyllura të zhvilluara me deputetët Paloka, Spaho, Alibeaj, Noka, Salianji, Bylykbashi dhe Strazimiri mësohet se kreu i PD- së ka konfirmuar si të vërtetë faktin se prej disa kohësh po survejohet nga persona të Policisë Operacionale. Sipas burimeve, Basha ka deklaruar se survejimi ndaj tij ka ardhur pak ditë pasi ai dhe deputetët e grupit parlamentar kanë bërë publik skandalin me vëllain e ministrit të Brendshëm, Fatmir Xhafaj. Ai ka theksuar se pavarësisht këtyre survejimeve, opozita do të vijojë me denoncimet e saj, ndërkohë që ka udhëzuar tre prej deputetëve të Grupit Parlamentar të PD- së të zhvillojnë një takim me drejtorin e Policisë së Shtetit.
TAKIMI
Nënkryetari i PD- së, Edi Paloka, nënkryetari i Komisionit të Ligjeve, Enkelejd Alibeaj, dhe nënkryetari i Komisionit të Sigurisë Kombëtare në Kuvend, Flamur Noka, kërkuan menjëherë një takim me drejtorin e Përgjithshëm të Policisë së Shtetit, Ardi Veliun. Në takimin që zgjati vetëm pak minuta, deputetët e PD- së kanë kërkuar shpjegime lidhur me survejimin që po i bëhet kreut të opozitës dhe familjarëve të tij. Gjithashtu, mësohet se deputetët e PD- së kanë deklaruar se për kreun e opozitës në ligj është e përcaktuar se mbrojtjen e siguron Garda e Republikës dhe se do të ketë përgjegjësi personale për këdo që përdor Policinë e Shtetit.
REAGIMI
“Panorama” kontaktoi dy ditë më parë me kreun e opozitës Lulzim Basha, lidhur me informacionet që ne zotëronim se ai dhe familjarë të tij po survejohen prej disa kohësh nga segmente të Policisë Operacionale. Kreu i opozitës as nuk e pohoi dhe as nuk e mohoi këtë informacion. Por pavarësisht kësaj, Basha siguroi se do të vijojë i pashqetësuar aksionin e tij opozitar. “Në çdo rrethanë, unë do të vazhdoj aktivitetin tim opozitar”, tha Basha për “Panorama”. Për shkak të informacioneve të marra nga agjencitë ligjzbatuese, afro një vit më parë kreu i PD- së, Lulzim Basha, u mor në mbrojtje nga Policia e Shtetit ndërkohë që në këtë rast, sipas opozitës, ai po survejohet në paligjshmëri me urdhër politik.