LETRA E PLOTË E PRODHUESVE TË BUKËS
Ministrit të Energjetikës dhe Industrisë, Damian Gjiknuri Kërkesë për zgjidhjen e problemit të energjisë elektrike, që kanë furrat e bukës me OSHEE- në. Zoti ministër, ju drejtohemi ju që të na ndihmoni në zgjidhjen e problemit që kanë furrat e bukës me OSHEE- në. Furrat e bukës subvencionohen për energjinë elektrike, duke paguar 7,6 lekë për kilovat. OSHEE kërkon dhe ka kaluar në heqjen e këtij subvencioni dhe ne po e paguajmë energjinë elektrike me 14 lekë për kilovat. Kjo heqje e subvencionit argumentohet prej OSHEE, sepse në furrat e bukës ka frigoriferë, që tregtojnë prodhimet e tyre, si ëmbëlsira, byrekë, etj. Prodhuesit e bukës nuk janë dakord me këtë masë, sepse frigoriferët tregtues harxhojnë vetëm 5 deri në 10 për qind të gjithë energjisë që konsumon furra e bukës dhe e konsiderojmë të padrejtë nga OSHEE që të heqë 100 për qind subvencionimin e korrentit. Te furrat që aktualisht u është hequr subvencioni, si dhe te furrat e reja që po hapen, ku korrenti paguhet me 14 lekë për kilovat, vërehet një rritje e pagesës mujore të korrentit 100 për qind më e madhe, gjë që ka rritur ndjeshëm koston e prodhimit të bukës. Kjo, nëse vazhdon, do të ndikojë në rritjen e çmimit të bukës. Ne jemi të shqetësuar dhe kërkojmë ndihmën dhe ndërhyrjen tuaj për një zgjidhje institucionale dhe për këtë propozojmë: 1. Të hiqen frigoriferët e bulmetit, ujit dhe pijeve freskuese. 2. Te furrat e bukës që kanë frigoriferë për tregtimin e produkteve të tyre, si: ëmbëlsira, byreqe etj., të aplikohet 90 për qind me çmimin 7,6 lekë dhe 10 për qind me 14 lekë 3. Të mbetet çmimi 7,6 lekë për kilovat për furrat e bukës që nuk disponojnë bazë frigoriferike për tregtim