“Ligj për Tiranën”, Veliaj: Më shumë financa
Ligj të veçantë për organizimin, model “Ligji për Prishtinën”
Marrëdhëniet midis pushtetit vendor Shqipëri- Kosovë dhe sfidat integruese në Bashkimin Europian ishin temat e takimit që kryebashkiaku i Tiranës, Erion Veliaj, pati me Kryeministrin e Kosovës, Ramush Haradinajn. Ashtu si edhe Prishtina, kryetari bëri me dije se edhe Tirana do të ketë një ligj të posaçëm për funksionimin dhe organizimin e qytetit. Kreu i qeverisë duket se ka dhënë “OK”, ndërsa çështja mbetet te zbatimi. Model për këtë do të shërbejë “Ligji i Prishtinës”. “Kemi pasur gatishmërinë e Kryeministrit Rama që Tirana, ashtu si Prishtina, duke qenë se u shërben më shumë qytetarëve se sa vetëm rezidentëve, pra atyre që vijnë çdo ditë në qytet për punësim, për arsim, për spitalet, për hipotekat, për shkollat, për gjykatat, do të thotë që ka nevojë për më shumë kompetenca, e sigurisht edhe më shumë financa. Kështu që, do të mbështetemi në projektligjin dhe në ligjin sot të miratuar të qeverisë ‘ Haradinaj’, si një model se çfarë mund të bëjmë edhe me një ligj special për Tiranën, si shumica e kryeqyteteve europiane”, nënvizoi Veliaj. Zhvillimi i qyteteve ka një ndikim të drejtpërdrejtë edhe në sfidat integruese, me të cilat përballen sot Shqipëria dhe Kosova. Ndaj, ai theksoi se është e pafalshme për të dyja shtetet që të humbasin kohë me debate që frenojnë këto procese. “Ne ndajmë sfida të përbashkëta; sfida kryesore është përmirësimi i jetës së qyteteve, për t’i çuar ato në një standard europian. Bashkë me mikun tim e shohim integrimin europian si destinacion brenda nesh. Nëse Tirana, Prishtina, Suhareka, Durrësi, Pogradeci, Gjakova janë qytete më europiane, atëherë bashkësia e gjithë këtyre qyteteve prodhon një realitet modern. Jam shumë i inkurajuar nga i gjithë progresi që është bërë. Jemi përpara sfidave: sfida jonë për hapjen e negociatave, sfida e Kosovës për liberalizimin e vizave. Ama, besoj që secili ka futur marshin e pestë me një shpejtësi dhe një cilësi të paprecedentë, nga dëshira për të rikuperuar kohën e humbur. Është e pafalshme që shqiptaria të humbasë më shumë kohë”, u shpreh ai.