Deri në 16 mijë euro për në Angli, kapen dy organizatorët
Të arrestuarit Musa Rama dhe Arben Hako, me precedentë
Dërgonin emigrantë me viza false në Angli kundrejt një pagesë që arrinte deri në 16 mijë euro, kapen dy organizatorët.
Musa Rama, 60 vjeç, lindur në Librazhd dhe banues në Tiranë, dhe Arben Hako, 51 vjeç, lindur dhe banues në Durrës, të dy të dënuar më parë, janë vënë në pranga nga Policia pas një hetimi disamujor, që përfshiu edhe mbajtjen nën përgjim të tyre. Rama dhe Hako dyshohet se janë organizatorët e një rrjeti për trafikimin e klandestinëve në Angli, Gjermani dhe vende të tjera. Këtë veprimtari ata e kryenin duke falsifikuar viza dhe dokumente të tjera. Në cilësinë e provës materiale, Policia ka sekuestruar 14 pasaporta biometrike, dokumente dhe certifikata të falsifikuara, si dhe 850 euro. Dy të arrestuarit në bashkëpunim me njëri- tjetrin, prej disa kohësh, mundësonin dërgimin e shtetasve të ndryshëm në drejtim të Anglisë, Gjermanisë e vendeve të tjera të Europës, duke e bërë të mundur me falsifikimin e dokumenteve dhe përdorimin e for- mave dhe metodave të tjera, përkundrejt shumave në vlera 10 mijë deri në 16 mijë euro për person. Nga kontrolli i banesave të tyre janë sekuestruar në cilësinë e provave materiale: një automjet, shtatë telefona celularë, 14 pasaporta biometrike të shtetasve të ndryshëm, 80 copë dokumente në gjuhën shqipe dhe gjermane, 35 copë certifikata personale dhe familjare shtetasish të ndryshëm, si dhe 13 copë certifikata shkolle dhe trajnimesh dhe një sasi parash prej 850 euro. Arrestimi i Musa Ramës dhe Arben Hakos u bë i mundur nga strukturat e Drejtorisë Vendore të Policisë Elbasan, në bashkëpunim me Drejtorinë Vendore të Policisë Tiranë. Hetimi dhe mbajtja nën përgjim i tyre erdhi pas denoncimit të bërë nga një qytetar nga Elbasani, i cili u kishte paguar shumën e kërkuar për të shkuar në Angli, por ende nuk kishte marrë pasaportën me vizën false. Prokuroria vijon ende hetimet për të zbuluar nëse ka edhe persona të tjerë të përfshirë në këtë rrjet.