U nis nga Vlora, kapet në Itali gomonia me 2.5 tonë kanabis
Në ndjekje të mjetit lundrues, Policia shqiptare dhe e Malit të Zi
Policia italiane ka arritur të sekuestrojë një sasi rekord prej 2.5 tonë lëndësh narkotike e llojit kanabis sativa nga një gomone që kishte si destinacion brigjet italiane.
Operacioni ka nisur në ujërat e Brindisit, por më pas, në ndjekje të gomones janë vënë Policia shqiptare dhe ajo e Malit të Zi. Mediat italiane raportojnë se dyshohet se gomonia mund të jetë nisur nga brigjet e Vlorës. Madje, thuhet se nisja e saj është kthyer nga zona të thella të territorit të Vlorës që, në fakt, është nën kontrollin e mafies lokale dhe jo të Policisë. Por pavarësisht sekuestrimit të lëndës narkotike, trafikantët bashkë me gomonen kanë arritur që t’i shpëtojnë kapjes nga Policia. Lëvizjet e para të gomones janë pikasur rreth orës 16: 25 të së shtunës, ku një avion i Guardia di Finanza të Pulias, gjatë kontrollit në hapësirën detare, pikasi një mjet lundrues që lëvizte me shpejtësi në ujërat italiane, në largësi rreth 40 milje nga bregu. Menjëherë në ndjekje janë vënë dy mjete lundruese të Guardia di Finanza, duke u përpjekur të kapin mjetin lundrues të llojit gomone, i cili ishte i ngarkuar dhe lëvizte me shpejtësi. Ndërkohë, partnerët italianë kanë njoftuar Policinë Kufitare në Shqipëri. Disa mjete të Policisë Kufitare dhe të Guardia di Finanza në Durrës dhe Vlorë janë vënë në gatishmëri, në pritje të hyrjes së gomones në ujërat territoriale shqiptare. Por gomonia e ngarkuar, në ndjekje nga Guardia di Finanza e Pulias ka shtuar shpejtësinë, duke hedhur në det ngarkesën. Më pas, ajo i është drejtuar territorit të Malit të Zi, duke u futur në këto ujëra. Policia malazeze ka mundur që t’i afrohet gomones, por pas një ndjekjeje për rreth 1 orë, ka humbur gjurmët e saj. Ndërkohë që Guardia di Finanza ka rikuperuar drogën e hedhur në det në ujërat ndërkombëtare në afërsi të ujërave territoriale të Malit të Zi, ku rezultoi një sasi prej 2 tonë e 475 kilogramë marijuanë. Autoritetet policore në tre shtetet po vijojnë hetimet dhe shkëmbimin e informacionit për zbulimin dhe ndalimin e trafikantëve, por ende nuk ka të dhëna për origjinën e lëndës narkotike dhe shtetin nga ku mund të jetë nisur gomonia. Ndërkohë, autoritetet italiane ia kanë kaluar çështjen antimafies së Leçes, e cila gjithashtu ka në dorë dhe shumë çështje të tjera që lidhem me trafikun e drogës mes Shqipërisë dhe Italisë.