Qeveria nxjerr ligjin për shembjen e Teatrit Kombëtar, artistët: Do kaloni mbi trupat tanë
ZBULOHET PROJEKTLIGJI, VELIAJ DO NEGOCIOJE ME KOMPANINE “FUSHA SHPK” PER TOKEN E TEATRIT. NDRENIKA: RAMA SI ERDOGANI
ROBERT NDRENIKA, ARBEN DERHEMI DHE MIRUSH KABASHI, DJE GJATE PROTESTES KUNDER SHEMBJES SE TEATRIT KOMBETAR
"Lufta e ftohtë mbaroi. Tani fillon lufta e vërtetë!". Nëse Ministria e Kulturës, qeveria e me shumë gjasë dhe Parlamenti shqiptar e kanë vulosur një herë e përgjithmonë shembjen e godinës së Teatrit Kombëtar, artistët nuk kanë hequr dorë nga teatri i tyre, madje, duket se fillon rezistenca e vërtetë.
Gjatë një takimi të improvizuar dje në mbrëmje u bë thirrje për mbrojtjen e teatrit deri në grevë urie. Aktori Robert Ndrenika e krahasoi Kryeministrin Rama me Erdoganin, ndërsa aktori Arben Derhemi tha se teatri do të mbrohet me gjak. Aktori Neritan Liçaj tha me bindje se nuk do të lejohej asnjë pëllëmbë e truallit të teatrit, ndërsa u bëri thirrje deputetëve të votojnë me zemër dhe jo si numër apo teserë partie. Regjisori Robert Budina akuzoi Presidentin e Republikës, kryetarin e Kuvendit, por edhe kryetarin e opozitës, se premtimet e tyre dhe mbështetja që u kanë dhënë, ishin gënjeshtra.
NDRENIKA: RAMA NA KA PËRBUZUR
Aktori Robert Ndrenika e ka krahasuar Kryeministrin Rama me Erdoganin. "Kjo që ka ndodhur ishte e papritur për komunitetin teatror. Ishte e papritur për mua. S'marr vesh çfarë po ndodh. Kemi qenë te Presidenti i Repub- likës, Kryetari i Kuvendit që na ka dhënë plotësisht të drejtë, opozita është me ne dhe jam shumë i bindur që ka shumë nga Partia Socialiste që janë me ne, por nuk flasin. Nuk flasin se kanë hallet e tyre. Këtu u bë puna si te ' Tre Musketierët', ku Kardinali Reshelje më vete dhe të mbretit më vete. Nuk ka lezet kështu, në vitin 2018. Unë them që edhe Prokuroria ta shohë këtë punë, ta hetojë. Përse duhet ta marrë "Fusha shpk", se ka dhe "Kodra shpk"..., ç'janë këto preferenca? Të vjen keq që nuk e kanë përfillur fare komunitetin teatror, përveç Presidentit të Republikës dhe Kryetarit të Kuvendit, kurse Kryeministria na ka përbuzur. Duhet të hyjmë në bisedime, nuk vazhdohet me gjëra arbitrare. Vetëm Erdogani i bën këto punë".
DERHEMI: DO SHKOJMË NË GREVË URIE
Aktori Arben Derhemi u ka bërë thirrje qytetarëve të Tiranës të mbrojnë teatrin, deri në grevë urie. "Nuk ka më vend për të qenë njerëzorë. Nuk ka më vend që të jemi ne që takojmë opozitën apo Presidentin e Republikës. Ne duhet të marrim në dorë fatet e këtij teatri. Ky teatër nuk do të shembet. Një diktator, një uzurpator ' allalla o rezil, o katil allalla/ shtroni udhën me hithr'e me shtog turfanda'. O kryeministër, që të gënjen mendja se je dikush dhe që mendon se mund të bësh ç'të duash me Teatrin Kombëtar. Të gjithë bashkë do shkojmë deri në grevë urie. Vetëm kur të kalojnë mbi trupat tanë do të shembet Teatri Kombëtar. Nuk e kuptoj ku janë aktorët e tjerë të teatrit. Çfarë prisni që t'ju bëjë më shumë drejtori juaj, çfarë prisni t'ju bëjë më shumë Kryeministri juaj? Deri ku do shkojmë? Do na përdhunojnë ndonjë ditë. Nuk ka më vend për tolerancë. E vetmja rrugë është lufta. Merrni hunjtë dhe ky teatër do mbrohet me gjak, do apo s'do Kryeministri shqiptar. Do të mbrojmë të gjithë bashkë historinë e këtij vendi, atë që kemi dashur dhe do të duam gjithnjë, që të mos thonë maqedonasit që na thonë shpellarë. Populli i Tiranës të mbështesë Teatrin Kombëtar deri në akte sublime, deri në grevë urie".