Meta: Lidhja e Prizrenit përfaqëson aspiratat tona për prosperitet
Presidenti i Republikës, Ilir Meta, mori pjesë në ceremoninë përkujtimore të 140- vjetorit të Lidhjes historike të Prizrenit. Në ceremoninë ku merrnin pjesë edhe Kryeministri kosovar, Ramush Haradinaj, dhe personalitete të larta të qeverisë së Kosovës, kreu i shtetit shqiptar deklaroi se Lidhja e Prizrenit qëndron në themel të aspiratave të shqiptarëve. “Në historinë e popullit shqiptar sa më shumë kohë do të kalonte, aq më shumë do të lartësohej Lidhja Shqiptare e Prizrenit dhe do të kuptohej mesazhi i saj frymëzues përgjithmonë. Shpallja e pavarësisë së shtetit shqiptar në Vlorë në vitin 1912, shpallja e pavarësisë së shtetit të Kosovës, zgjerimi i lirive dhe të drejtave të shqiptarëve në hapësirat e tyre në Ballkan, nuk ndahen asnjë çast nga Lidhja Shqiptare e Prizrenit, nga programi, vizionet dhe aspiratat e saj për të lartësuar identitetin kombëtar dhe europian të shqiptarëve. Lidhja Shqiptare e Prizrenit qëndron edhe sot e gjithë ditën në përpjekjet e mëdha të mbarë shqiptarëve për të zgjeruar hapësirat e tyre të lirisë, demokracisë dhe integrimit europian dhe euroatlantik. Si e tillë, ajo nuk është një relike historike, por është edhe sot një vepër e gjallë frymëzuese për të gjithë ne dhe për të gjitha kohërat. Veçanërisht Lidhja Shqiptare e Prizrenit, udhëheqësit e saj vizionarë dhe legjendarë, pasuesit e tyre janë një frymëzim për rininë shqiptare, që të rritet me frymë atdhetare, me shpirtin e lirisë, me formim qytetar e demokratik, me kulturë bashkëkohore dhe europiane. Vetëm me një rini të tillë ëndrra e Lidhjes Shqiptare të Prizrenit jo vetëm do të mbahet gjallë, por aspiratat e saj legjitime do vijojnë të jenë frymëzim mbarëshqiptar në kohët që do vijnë”, tha Presidenti. Kreu i shtetit mori pjesë dhe përuroi edhe gurthemelin e kompozicionit të shtatoreve të udhëheqësve të Lidhjes së Prizrenit: Ymer Prizeni dhe Abdyl Frashëri. Një mesazh në 140- vjetorin e themelimit të Lidhjes shqiptare të Prizrenit dha edhe kreu i qeverisë Edi Rama. Kryeministri, përmes një postimi në “Facebook” u shpreh se mesazhi që dha ajo ngjarje historike kumbon i thjeshtë, por domethënës, dje, sot e përgjithmonë. “Sot përkujtojmë 140- vjetorin e themelimit të Lidhjes Shqiptare të Prizrenit, mesazhi i së cilës kumbon i thjeshtë, por domethënës, dje, sot e përgjithmonë: asnjëherë virtyti dhe aq më pak fati e kanë braktisur një Shqipëri të përbashkuar. Kjo ditë na kujton gjithashtu se po i afrohemi fundit të gjysmës së parë të Vitit të Skënderbeut, arritjet pa zhurmë dhe eventet unike të të cilit po zhvillohen anembanë kombit shqiptar në trojet e tij stërgjyshore dhe në diasporë”, shkruan Rama.