Qeveria, projektligj i posaçëm për shembjen e Teatrit Kombëtar
Do të ngrihet një komision që do të negociojë me firmën private "Fusha shpk”, që do të ndërtojë godinën e re të teatrit
Nuk ka më asnjë dyshim: godina e Teatrit Kombëtar do të shembet.
Ministria e Kulturës e ka hedhur firmën e para, duke hartuar projektligjin e posaçëm që parashikon kalimin e truallit ku ngrihet sot TK- ja, pra pronën publike, një firme private. Edhe pse gjatë këtyre tre muajve të fundit janë dëgjuar thënie e kundërthënie, betime e përbetime, duke filluar që nga Kryeministri Rama te ministrja e Kulturës, Mirela Kumbaro, kryebashkiaku i Tiranës, deputetë e kështu me radhë, tashmë shembja e Teatrit Kombëtar është një fakt. Nuk bëhet fjalë më as për ide, projekt- ide, oferta, vullnete politike etj., qeveria shqiptare ka hartuar një projektligj dhe e ka hedhur për konsultim (!), vetëm për këtë çështje: kalimin e një prone publike në qendër të kryeqytetit, privatit, i cili së bashku me kullat e veta do të bëjë edhe një godinë të re për Teatrin Kombëtar. Nëse të gjithë i trembeshin një teatri me një kullë, tanimë do të kemi 7 kulla ( apo sado qofshin) me një teatër. Që në nenin e parë të projektligjit përcaktohet objekti, sipas të cilit "Ky ligj ka për objekt përcaktimin e procedurës së veçantë për negocimin dhe lidhjen e kontratës me objekt realizmin e projektit të zhvillimit të zonës së Teatrit Kombëtar, duke përfshirë projektimin, ndërtimin dhe dorëzimin e godinës së re të Teatrit Kombëtar". Ndërkohë që qëllimi është "Realizimi i projektit për zhvillimin e një zone urbane në qytetin e Tiranës dhe ndërtimin e godinës së re të Teatrit Kombëtar me partner privat". Ky projektligj, pas diskutimit, që nuk dihet se me kë, do të kalojë për miratim në Kuvendin e Shqipërisë, duke ia lënë vulën e shembjes së godinës historike të Teatrit Kombëtar jo vetëm një ministrie apo një qeverie, por gjithë shtetit shqiptar. SHQYRTIMI I OFERTËS
Pas asnjë thirrje publike, asnjë konkurs, asnjë tender, qeveria shqiptare do t'i japë tokën e Teatrit Kombëtar shoqërisë "Fusha shpk". Në nenin 3 të projektligjit të posaçëm parashikohet që "Në dispozicion të zhvillimit të projektit vihen pasuritë e paluajtshme në pronësi të shtetit, sipas parashikimeve të këtij ligji, Kodit Civil dhe legjislacionit për pronat e paluajtshme". Pavarësisht protestave të artistëve, kërkesave të vazhdueshme për transparencë, për hapje konkursesh etj., nga njëra anë dhe përpjekjeve për të zbutur rezistencën, për të përçarë artistët, për të hartuar alibi, po ndodh pikërisht ashtu si deklaroi Kryeministri Rama gjatë prezantimit të projektit të arkitektit danez, në ambientet e Kryeministrisë. Ai tha se godina e Teatrit Kombëtar do të shembet, madje dhe se kjo punë ishte vonuar ca si tepër dhe se për këtë, për të rregulluar marrëdhënien mes shtetit dhe privatit, do të hartohej një ligj i posaçëm. Dhe ja ku ndodhi. Dy ditë më parë, Ministria e Kulturës ka publikuar draft- projektligjin në fjalë. Ky i fundit parashikon ngritjen e një komisioni të përbërë nga përfaqësues të Bashkisë së Tiranës, Ministrisë së Drejtësisë; së Financës dhe Ekonomisë; Infrastrukturës dhe Energjisë; së Kulturës; Avokaturës së Shtetit dhe Teatrit Kombëtar. Ky komision, i cili "gëzon të gjithë të drejtat për vlerësimin mbi tjetërsimin e pronave në pronësi të pushtetit qendror apo të vetëqeverisjes vendore për realizimin e këtij projekti", do të marrë në shqyrtim propozimin e ofruar nga firma private mbi zhvillimin e projektit. ( Sipas projektligjit duhet të paraqesë analizën teknike, e cila duhet të përmbajë sfondin e projektit; konceptin e projektit; vendndodhjen; sipërfaqen totale publike dhe private të zbatimit të projektit; studimet topografike dhe gjeologjike; përshkrimin konstruktiv, funksional dhe teknik të projektit; standardet teknike; periudha e vlerësuar e ndërtimit të teatrit; Analiza ekonomike dhe fi- nanciare duhet të përmbajë kostot e projektit). Pas shqyrtimit dhe rënies dakord, kushtet e hartuara kalojnë në Këshillin Bashkiak. Pas miratimit me shumicë votash, kryetari i bashkisë lidh kontratën 10 ditë pas hyrjes në fuqi të vendimit të Këshillit të Ministrave për miratimin e kontratës. Paskëtaj, gjithçka është e qartë. Rruspat pritet të rrethojnë godinën e Teatrit Kombëtar.