Dhuna ndaj bashkëjetueses nxjerr mashtrimet e kosovarit
U mori dy personave 1.5 mln lekë, duke u premtuar punë
Një 36- vjeçar nga Kosova dhe banim në Elbasan ka përfunduar në prangat e policisë pas denoncimit të bashkëjetueses së tij për dhunë.
I arrestuari është Burim Pushkolli, i cili nga hetimet e mëtejshme rezultoi se gjithashtu u kishte marrë para dy të njohurve të bashkëjetueses së tij përmes mashtrimit. 36vjeçari nga Kosova u denoncua nga S. P., 39 vjeçe, banuese në Elbasan, ku deklaroi para Policisë se në mënyrë të vazhdueshme ka ushtruar ndaj tij dhunë psikologjike dhe fizike. I riu jetonte prej kohësh në Elbasan, ndërsa më parë çifti ka bashkëjetuar dhe në Kosovë. Policia, pasi ka arrestuar të riun nga Vushtrria e Kosovës ka konstatuar në bazë të hetimeve se ky shtetas, nëpërmjet shpërdorimit të besimit, ka mashtruar dy shtetas duke u mar- rë lekë me premtimin se do t’i ndihmonte për t’i punësuar. Nga verifikimet e kryera, Burim Pushkolli nëpërmjet shpërdorimit të besimit i ka marrë një sasi prej 100.000 mijë lekësh shtetasit F. M., 47 vjeç, banues në Elbasan, duke i premtuar se do e ndihmonte të regjistronte djalin në Akademinë e Sigurisë në Tiranë. Gjithashtu, rezulton se shtetasi i mësipërm i ka marrë duke shpërdoruar besimin një sasi prej 50.000 mijë lekësh edhe shtetasit N. L., 32 vjeç, banues në Elbasan, të cilit i ka premtuar se do e fuste në punë në aeroportin “Nënë Tereza” në Tiranë. Të dyja rastet, 36vjeçari i kishte njohur nga bashkëjetuesja e tij. Kanë qenë këta të fundit që kanë denoncuar mashtrimin e shtetasit kosovar në Polici. Por sikur të mos mjaftonte kaq, nga verifikimet e bëra me Policinë e Kosovës, ka rezultuar se për këtë shtetas ka urdhër arresti për tri vepra penale për mashtrim. Nga ana Policisë së Elbasanit është komunikuar me Zyrën Interpol Tirana për kryerjen e verifikimeve të mëtejshme për këtë shtetas, ndërkohë që çështja e tij i ka kaluar Prokurorisë së Elbasanit për veprën penale të “Dhunës në Familje” dhe “Mashtrimit”. “Nga Specialistët për Hetimin e Krimit është bërë arrestimi në flagrancë i shtetasit: B. P., 36 vjeç, banues në Vushtrri, Kosovë. Arrestimi i tij u krye sepse ndaj tij ka bërë kallëzim penal shtetasja S. P., 39 vjeçe, banuese Elbasan, se shtetasi B. P. ka ushtruar dhunë psikologjike dhe fizike në mënyrë të vazhdueshme ndaj saj, pasi kjo bashkëjetonte me këtë shtetas”, bën të ditur Policia.