Trump tërheq SHBA nga deklarata e përbashkët e vendeve të G7
Presidenti Donald Trump u grind me Kryeministrin kanadez, Justin Trudeau dhe kërcënoi të vendoste ndëshkime për importet e automobilave të huaj të shtunën, duke i dhënë fund nga ana e tij takimit të acaruar të G7s, i cili dëmtoi me shumë lidhjet mes SHBA- ve dhe aleatëve më të ngushtë të saj. Trump tha të shtunën në mbrëmje se ai kishte udhëzuar zyrtarët e SHBA- ve të tërhiqnin mbështetjen e vendit për një deklaratë të përbashkët me vendet e tjera anëtare, të cilën ai e kishte mbështetur vetëm disa orë më parë, duke thënë se SHBA nuk do të bashkohej, pasi Trudeau publikisht kritikoi politikën tregtare të Trump. “Bazuar në thëniet e rreme të Justin në konferencën e tij dhe faktin se Kanadaja po vendos tarifa masive për fermerët, punëtorët dhe kompanitë amerikane, unë kam udhëzuar përfaqësuesit tanë që të mos e miratojnë Komunikatën, ndërsa ne shohim tarifat për automobilat që përmbytin tregun e SHBA!”, shkroi Trump në “Twitter”, pas largimit nga samiti i G7- s në Kanada. Trump, i cili nuk specifikoi se cilat prej deklaratave të Trudeau i konsideronte të rreme, tha se politikat tregtare amerikane ishin një përgjigje ndaj praktikave të padrejta kanadeze dhe e cilësoi udhëheqësin kanadez si “të dobët”. Trudeau kritikoi vendimet e Trump për ven- dosjen e tarifave ndaj çelikut dhe aluminit që hyjnë në SHBA nga Bashkimi Europian, Kanadaja dhe Meksika, duke e cilësuar “fyes” faktin që Trump përmendi sigurinë kombëtare të SHBAve për të arsyetuar këtë. Në konferencën e tij për shtyp, në fund të samitit, ai tha, “I kam theksuar drejtpërdrejt Presidentit amerikan se kanadezët nuk e kanë marrë lehtë faktin se Shtetet e Bashkuara kanë vendosur tarifa të mëdha në industrinë tonë të çelikut dhe aluminit. Veçanërisht, nuk e kanë marrë lehtë përcaktimin se arsyeja për këto tarifa është siguria kombëtare... dhe për kanadezët, që qëndronin krah për krah me ushtarët amerikanë në vende të largëta në konflikte që nga Luf- ta e Parë Botërore e më tej, kjo është fyese”, tha Trudeau. Vendet e tjera anëtare të G7: Franca, Italia, Gjermania, Britania, Japonia dhe Kanadaja shpresonin që me këtë samit të afronin lidhjet me administratën e Trump. Por në vend të kësaj, krisja e marrëdhënieve u thellua. Tani udhëheqësit nga G7 dhe vende të tjera përballen me një varg vendimesh tregtare që do të ruajnë ose riorganizojnë sistemin ekonomik ekzistues, duke vënë në diskutim miliona vende pune dhe miliarda të ardhura. Trump paralajmëroi vendet e tjera në G7 dhe në mbarë botën, se madhësia e ekonomisë së SHBA- ve do të thotë që kombet e tjera nuk mund të fitojnë një luftë tregtare.