Rama: Arsimi profesional prioritet
“Në 10 vitet e ardhshme, punësimi në turizëm shkon në 250 mijë”
Kryeministri Rama u kërkoi të rinjve të orientohen drejt arsimit profesional në fushën e turizmit në qytetin e Durrësit. Rritja e turizmit, sipas Kryeministrit, do të kërkojë dhe punonjës të kualifikuar. “Turizmi, vitin e kaluar ka pasur 42 mijë të punësuar të regjistruar më shumë. Projeksioni i studimeve, të bëra nga organizatat ndërkombëtarë dhe nga ne, është që në 10 vitet e ardhshme mund të shkojë në 250 mijë. Ashtu sikundër këtë vit, vetëm në 3- mujorin e parë kemi 12- 13% rritje të numrit të turistëve dhe do të arrijmë mbi 15% rritje. Brenda 5 viteve mund të shkojmë në 10 milionë turistë, por natyrisht na duhen investime, sepse na duhen shtretër. Kemi një numër të kufizuar shtretërish në raport me kërkesën. E dinë shumë mirë edhe ata që kanë investuar dhe investojnë në turizëm, se kur bëjnë kontratat, i bëjnë me një pjesë të asaj që kërkohet, sepse numri që kërkohet është shumë më i lartë”, tha Rama. Kryeministri theksoi faktin se, “ata që mbarojnë arsimin profesional kanë shumë më tepër mundësi që të fillojnë punë shumë më shpejt se të tjerët, madje më shpejt edhe se ata që mbarojnë universitetin”. “Ne ishim para pak ditësh në kantierin e kompresorëve të TAP në Fier dhe pamë saldatorë tajlandezë, apo nga Pakistani dhe Turqia. Edhe në stadiumin e ri kombëtar në Tiranë, saldatorët, shumica dërrmuese, janë të huaj”, – tha Rama. Në këtë drejtim, kreu i qeverisë u shpreh se “Shqipëria është ende peng i një prapambetjeje prej disa dekadash, ku u hap një boshllëk i madh në pikëpamje të zanateve e profesioneve që i duhen tregut të punës”. “Ne këtu te ky kompleks kemi 6 kuzhinierë turq, jo sepse nuk ka kuzhinierë shqiptarë, por janë ende shumë pak në raport me nevo- jat. Sepse për mbi 20 vite u mendua si të krijojmë juristët dhe arritëm të kemi numrin më të madh të juristëve për metër katror në botë dhe sistemin më të mjerë të drejtësisë”, tha Rama. Disa nga të rinjtë sollën përvojat e tyre në kërkimin e gjetjen e punës. E përbashkëta e shumë prej tyre është se kanë mbaruar arsimin profesional. Ata dëshmuan se kualifikimi i duhur në përputhje me tregun e punës ua bëri më të lehtë gjetjen e punës. Edhe vetë kompleksi FAFA, ku 60% e të punësuarve vijnë nga shkollat e arsimit profesional, është një dëshmi e faktit se arsimi profesional rrit mundësitë për punësim.