Përplas me fuoristradë çiftin në rrugë, vdes burri, rëndë gruaja
SHKODER - U përplasën nga fuoristrada, bashkëshorti gjen vdekjen, ndërsa e shoqja është në gjendje të rëndë. Një aksident i rëndë automobilistik i ka marrë jetën 53vjeçarit Besnik Beci, ndërsa gruaja e tij, Alma Beci, 44 vjeçe, ndodhet në gjendje të rëndë në spital. Çifti u përplas nga fouristradë tip "Benz", me targë AA 771 SE, në aksin rrugor Shkodër - Hani i Hotit, rreth orës 22: 20 të së dielës, pak metra larg bustit të 5 Heronjtë të Vigut. Besnik dhe Alma Beci po ecnin në këmbë, në anën e djathtë të rrugës kur shkon nga Shkodra në drejtim të Hanit të Hotit, kur fuoristrada që po shkonte në drejtim të Shkodrës, i mori përpara. Shoferi Gjergj Toni, 49 vjeç, ka tentuar që të largohet nga vendngjarja, por vetëm pasi ka ecur rreth 500 metër ka humbur kontrollin e makinës, duke dalë jashtë rruge. Mjeti ka dëmtuar edhe bordurat dhe mbrojtëset e varrezave. Më pas, forcat e Policisë kanë bërë të mundur ndalimin e 49- vjeçarit. Fillimisht, Policia ka menduar se janë dy aksidente të ndryshme që nuk kanë lidhje me njëra- tjetrën, por më pas është mësuar se shoferi i fuoristradës po tentonte të largohej nga vendi i ngjarjes. Kohët e fundit, numri i aksidenteve në aksin nacional ShkodërHani Hotit ka ardhur duke u rritur, kjo edhe për shkak të mungesës së ndriçimit, edhe pse është e banuar në të dyja anët e saj. Përveç kësaj, problem mbetet edhe shpejtësia e madhe e lëvizjes dhe mosrespektimi i rregullave të qarkullimit rrugor nga këmbësorët dhe pedaluesit, bashkë me drejtuesit e mjeteve. s. n