Premtimi: Ju çojmë në Itali për 1200 euro
FIER- Policia e Fierit arrestoi dje dy persona pasi transportonin shtetas pakistanezë me destinacion Italinë kundrejt pagesës. Ne pranga janë vënë Shahe Koko, 23 vjeç dhe Hamdi Seferi, 18 vjeç, të dy banues në Gjirokastër, të cilët kundrejt shumës prej 1200 eurosh do të kalonin për në Itali katër shtetas klandestinë.
“Nga Specialistët e Sektorit për Hetimin e Krimeve në Drejtorinë Vendore të Policisë Fier, u finalizua operacioni policor i koduar ‘ Premtimi’. Si rezultat i këtij operacioni, u ndaluan shtetasit Shahe K., 23 vjeç dhe Hamdi S., 18 vjeç, të dy banues në Gjirokastër. Ndalimi i këtyre shtetasve u bë pasi në bashkëpunim me njëritjetrin i kanë dhënë ndihmë për kalimin e paligjshëm të kufirit nëpërmjet pikës kufitare Kakavijë dhe trans- portimin kundrejt shumës 1200 euro për të kaluar transit në Itali katër shtetas pakistanezë. Materialet i kaluan Prokurorisë pranë Gjykatës së Shkallës së Parë Fier për veprën penale ‘ Ndihmë për kalim të paligjshëm të kufirit’ parashikuar nga Neni 298 i Kodit Penal”, thuhej në njoftimin e dhënë dje nga Policia e Fierit. Dyshohet se të rinjtë e kishin kthyer në biznes transportimin e klandestinëve, të cilët vendin tonë e kishin transit për të kaluar më tej në vendet e BE- së. Pasi janë vënë në dijeni për veprimtarinë e tyre, blutë e Fierit i kanë vënë ata në survejim, duke i ndaluar kështu në kushtet e flagrancës teksa po transportonin me mjetet e tyre klandestinët. Prej kohësh, trafiku i klandestinëve ka vënë në lëvizje Policinë për ta parandaluar atë.